علامہ اقبال اوپن یونیورسٹی کے میٹرک ،ْ ایف اے اور بی اے پروگرامز کے طلبہ کو کتابوں اور درسی مواد کی ترسیل کا عمل تیز

منگل مئی 13:59

اسلام آباد (اُردو پوائنٹ اخبارتازہ ترین۔ 22 مئی2018ء) علامہ اقبال اوپن یونیورسٹی کے میٹرک ،ْ ایف اے اور بی اے پروگرامز میں داخل طلبہ و طالبات کو کتابوں اور درسی مواد کی ترسیل کا عمل تیز کر دیا گیا ،ْ اب تک 2۔لاکھ ساٹھ ہزار سے زائد طلبہ کو کتب ارسال کی جاچکی ہیں ،ْ میٹرک پروگرام کے 80۔ہزار طلبہ کو ،ْ ایف اے کے ایک لاکھ پانچ ہزار اور بی اے پروگرام کے 74۔

ہزار طلبہ کو کتابیں ارسال کی جاچکی ہیں۔ شعبہ مینلگ کے انچارج کے مطابق سمسٹر بہار2018ء میں ریکارڈ داخلے ہوئے ہیں اور ترسیل کتب کا کام بروقت مکمل کرنا ایک بڑا چیلنج تھا لیکن یونیورسٹی کے وائس چانسلر ،ْ پروفیسر ڈاکٹر شاہد صدیقی نے کتابوں کی ترسیل کے مراحل کو جلد از جلد مکمل کرنے کی واضح ہدایات دی ہیں اور اس عمل کو مکمل کرنے کیلئے ایک ٹائم فریم دیا ہے۔

(جاری ہے)

انہوں نے کہا کہ مقررہ شیڈول کے اندر ترسیل کتب کے عمل کی تکمیل کو یقینی بنانے کیلئے شعبہ ترسیل کتب نے کام ہنگامی بنیادوں پر تیز کردیا ہے اور امید ہے کہ آئندہ ماہ کے پہلے ہفتے میں میٹرک ،ْ ایف اے اور بی اے پروگرامز میں داخل تمام طلبہ و طالبات کو کتابوں کی ترسیل کا عمل مکمل کرلیا جائے گا جبکہ جون کے دوسرے ہفتے سے پوسٹ گریجویٹ اور ٹیچرز ٹریننگ پروگرامز کی کتابوں کی ترسیل کا عمل شروع کردیا جائے گا۔

علاوہ ازیںکتابوں کی ترسیل کے مراحل کی معلومات کیلئے کمپیوٹرائزڈ ٹریکنگ نظام بھی شروع کیا گیا ہے۔اس سلسلے میں یونیورسٹی نے ایک نئی ویب سائٹ mailing.aiou.edu.pk بھی متعارف کرادی ہے۔داخلوں کے امیدوار اس نئی ویب سائٹ کے ذریعہ آسانی سے میل بکس میں اپنا رول نمبر یا داخلہ فیس کا چالان نمبر درج کرکے یونیورسٹی کی جانب سے انہیں ارسال کی جانے والی درسی کتابوں کے ترسیلی مراحل کے بارے میں تفصیلات معلوم کرسکتے ہیں۔

درسی کتابوں کی ترسیل میںتاخیر کی صورت میں طلبہ کو نزدیک ترین ڈاکخانے سے رجوع کرنے کی ہدایت کی گئی ہے۔ کتابوں کی ترسیل میں تاخیر کی صورت میں طلبہ یونیورسٹی کی ہیلپ لائن کے فون نمبر 051-111-112-468 پر رابطہ کرسکتے ہیں۔ اس سلسلے میں طلبہ ای میل ایڈریس mailing@aiou.edu.pkپر بھی رابطہ کرسکتے ہیں۔