Live Updates

عمران خان کی قریبی ساتھی نے ان کے وزیراعظم نہ بننے کی پیشن گوئی کردی

تحریک انصاف کے سربراہ کامیابیاں تو حاصل کریں گے مگر حکومت کسی ایک جماعت کے ہاتھ میں نہیں جائے گی: عائلہ ملک

محمد علی ہفتہ 30 جون 2018 21:03

میانوالی (اُردوپوائنٹ اخبارتازہ ترین۔30 جون 2018ء) عمران خان کی قریبی ساتھی نے ان کے وزیراعظم نہ بننے کی پیشن گوئی کردی، بقول عائلہ ملک، تحریک انصاف کے سربراہ کامیابیاں تو حاصل کریں گے مگر حکومت کسی ایک جماعت کے ہاتھ میں نہیں جائے گی۔ تفصیلات کے مطابق کئی برس تک عمران خان کے قریبی ساتھی رہنے والی سابق رکن اسمبلی عائلہ ملک کا کہنا ہے کہ وہ میانوالی میں عمران خان کا بھرپور مقابلہ کریں گی۔

انہوں نے گزشتہ 5 برس کے دوران میانوالی میں گراونڈ پر رہ کر بہت محنت کی تھی، تاہم اس کے باوجود انہیں تحریک انصاد نے ٹکٹ جاری نہیں کیا۔ عائلہ ملک کہتی ہیں کہ وہ سمجھنے سے قاصر ہیں کہ کیونکر انہیں اور ان کے گروپ کو ٹکٹ جاری نہیں کیے گئے۔ حلقے میں سروے کے ذریعے ٹکٹ جاری کرنا کا فیصلہ سراسر غلط ہے۔

(جاری ہے)

عائلہ ملک کہتی ہیں کہ وہ میانوالی میں عمران خان کا بھرپور مقابلہ کریں گی۔

عائلہ ملک کی رائے میں عمران خان میانوالی کی نشست سے کامیاب ہو جائیں گے، تاہم انہیں بھرپور مقابلے کا سامنا کرنا پڑے گا۔ عائلہ ملک مزید کہتی ہیں کہ انہیں لگتا کہ عمران خان وزیراعظم کے عہدے تک پہنچ پائیں گے۔ عائلہ ملک کی رائے میں عمران خان عام انتخابات میں کامیابیاں تو حاصل کریں گے، تاہم وہ سادہ اکثریت حاصل کرکے حکومت بنانے کی پوزیشن میں نہیں آئیں گے۔

عائلہ ملک کہتی ہیں انہیں ملک میں آئندہ مخلوط حکومت بنتی ہوئی نظر آ رہی ہے۔ واضح رہے کہ عمران خان نے عائلہ ملک اور نواب آف کالا باغ کو میانوالی سے ٹکٹس جاری کرنے سے معذرت کر لی تھی۔ اس تمام صورتحال کے باعث نواب آف کالا باغ اور عائلہ ملک کے گروپ نے بغاوت کرتے ہوئے تحریک انصاف کو خیرباد کہہ دیا تھا۔ نواب آف کالا باغ اور عائلہ ملک نے عمران خان کو عام انتخابات میں شکست دے کر ٹکٹ جاری نہ کیے جانے کا بدلا لینے کا اعلان کیا تھا۔ تاہم اب عائلہ ملک یہ سمجتھی ہیں کہ وہ عمران خان کیخلاف فتح حاصل نہیں کر پائیں گی۔