مسلم لیگ (ن) کی کامیابی کی صورت میں وزیراعظم، شہباز شریف ہوں گے ،ْشاہدخاقان عباسی

مری(اُردو پوائنٹ اخبارتازہ ترین - این این آئی۔ 18 جولائی2018ء) سابق وزیراعظم اور پاکستان مسلم لیگ (ن) کے امیدوار شاہد خاقان عباسی نے کہا ہے کہ اگر مسلم لیگ (ن) انتخابات میں کامیابی حاصل کرتی ہے تو وزیراعظم کا عہدہ شہباز شریف سنبھالیں گے تاہم حتمی فیصلہ انتخابی نتائج کے بعد مشاورت سے کیا جائے گا۔ایک انٹرویومیں انہوں نے اعلیٰ سطح پر پارٹی میں تقسیم کی باتوں سے انکار کرتے ہوئے کہا کہ رہنما آئین پر من و عن عمل درآمد کرنے کیلئے تیار ہیں۔

انہوں نے دعویٰ کیا کہ سابق وزیر اعظم نواز شریف، ان کی صاحبزادی مریم نواز اور داماد کیپٹن (ر) محمد صفدر کے خلاف مقدمہ امتیازی انداز میں چلایا گیا۔سابق وزیر داخلہ چوہدری نثار کے بارے میں انہوںنے کہاکہ انہیں پارٹی ٹکٹ اس لیے نہیں دیا گیا کیونکہ انہوں نے ایک مرتبہ بھی اس کیلئے درخواست نہیں دی کیونکہ جماعت میں نواز شریف، شہباز شریف اور مریم نواز سمیت ہر کوئی ٹکٹ کیلئے درخواست دیتا ہے۔

(جاری ہے)

مخلوط حکومت کے حوالے سے پوچھے گئے ایک سوال پر انہوںنے کہاکہ 2008 میں پیپلز پارٹی کے ساتھ اتحاد ایک ماہ بھی نہیں چل سکا تھا کیونکہ رہنماؤں کے مزاج میں فرق ہے لیکن اگر اس کی نوبت آئی تو انتخابات کے بعد اس معاملے پر تبادلہ خیال ہوسکتا ہے۔سابق وزیر اعظم نے کہا کہ انہوں نے اپنے حلقے میں اربوں روپے کے منصوبوں کا آغاز کیا اور بجلی کی فراہمی، سڑکوں اور ہسپتالوں کی تعمیر کے لیے بجٹ فراہم کیے اور یہ منصوبے تعمیری مراحل میں ہیں۔

انہوں نے کہا کہ علاقے میں جدید یونیورسٹی کی تعمیر میں حائل تمام رکاوٹیں دور کردی گئی ہیں اور اس سلسلے میں فنڈز بھی منتقل کردیے گئے ہیں، جس کے بعد منصوبے پر جلد کام کا آغاز ہو جائے ا۔شاہد خاقان عباسی نے کہا کہ حلقے کے عوام کے ساتھ ان کے قریبی تعلقات ہیں تاہم سیکیورٹی وجوہات کے باعث یہ مشکل تھا کہ وہ وزیر اعظم ہوتے ہوئے مسلسل علاقے کا دورہ کریں۔انہوں نے کہا کہ تمام سیاسی جماعتوں کو انتخابات کے لیے ایک جیسا ماحول فراہم کرنا چاہیے لیکن ایسا نہیں کیا جارہا، تاہم مسلم لیگ (ن) انتخابات میں اپنی کارکردگی کی بنیاد پر حصہ لے رہی ہے۔سابق وزیر اعظم نے کہا کہ ہم نے 11 ہزار میگا واٹ بجلی نظام میں داخل کی، انفرا اسٹرکچر بہتر کیا اور دہشت گردی کو ملک سے ختم کیا۔