ڈاکٹر یاسمین راشد الیکشن ہار کر بھی پنجاب اسمبلی پہنچ گئیں

پی ٹی آئی کی مخصوص 37 نشستوں کی فہرست میں یاسمین کا پہلا نمبر

ہفتہ 28 جولائی 2018 17:36

ڈاکٹر یاسمین راشد الیکشن ہار کر بھی پنجاب اسمبلی پہنچ گئیں

لاہور (اُردو پوائنٹ اخبارتازہ ترین - آن لائن۔ 28 جولائی2018ء) پاکستان تحریک انصاف نے پنجاب اسمبلی میں خواتین کی مخصوص نشستوں پر جن 27 خواتین کے ناموں کی فہرست الیکشن کمیشن کو فراہم کی تھی انہیں خواتین کی مخصوص نشستوں پر منتخب کر لیا گیا ہے، جس کے نتیجے میں لاہور سے حلقہ این اے 125 سے مسلم لیگ (ن) کے امیدوار کے ہاتھوں شکست کا سامنا کرنے والی پی ٹی آئی کی امیدوار ڈاکٹر یاسمین راشد الیکشن ہار کر بھی جیت گئی ہیں، ڈاکٹر یاسمین راشد کا خواتین کی مخصوص نشستوں پر منتخب ہونے والی پی ٹی آئی کی خواتین کی فہرست میں پہلا نمبر ہے، منتخب ہونے والی 27 خواتین میں سے 26 خواتین پہلی مرتبہ پنجاب اسمبلی کے ایوان میں جائیں گی، یہ بھی معلوم ہوا ہے کہ ڈاکٹر یاسمین راشد خواتین کی مخصوص نشستوں پر منتخب ہونے کے بعد پاکستان تحریک انصاف کے چیئرمین عمران خان سے ملاقات کرنے کے لئے اسلام آباد پہنچ گئی ہیں، پی ٹی آئی کے حلقوں کا کہنا ہے کہ ڈاکٹر یاسمین راشد بھی پی ٹی آئی کی جانب سے پنجاب میں حکومت بنانے کی صورت میں وزیراعلیٰ پنجاب کی دوڑ میں شامل ہیں، جنہیں آئین کے آرٹیکل 131 کے تحت پنجاب کا وزیراعلیٰ بنایا جا سکتا ہے۔