کراچی سے پی ٹی آئی کے ایک اور رکن قومی اسمبلی کے گلے شکو ے سامنے آگئے

چاہے اسلام آباد ہو یا کراچی،ہمیں نظر انداز کیا جارہا ہے،عارف علوی کراچی کے معاملات دیکھیں ،آفتاب جہانگیر

جمعرات 30 اگست 2018 15:50

کراچی (اُردو پوائنٹ اخبارتازہ ترین - این این آئی۔ 30 اگست2018ء) عامر لیاقت کے بعدپی ٹی آئی کے ایک اور رکن قومی اسمبلی کا اظہار محرومی اورگلے شکوے سامنے آ گئے ہیں، این اے 252 سے ایم این اے منتخب ہونے والے آفتاب جہانگیر نے کہا ہے کہ چاہے اسلام آباد ہو یا کراچی،ہمیں نظر انداز کیا جارہا ہے۔

(جاری ہے)

اپنے آڈیو بیان میں آفتاب جہانگیر نے کہا کہ ہم بھی کراچی سے منتخب ہوئے ہیں تاہم ہمیں ہرمعاملات پر نظرانداز کیا جارہاہے،انہوں نے کہا کہ ایم کیو ایم سے ملاقات ہویا ادارہ نورحق کا دورہ ہمیں نظر انداز کیا جارہا ہے۔

انہوں نے پی ٹی آئی کے صدارتی امیدوار ڈاکٹرعارف علوی سے مطالبہ کیا کہ آپ کراچی کے بڑے ہیں یہ معاملات دیکھیں۔واضح رہے کہ دو روز قبل عامر لیاقت نے بھی گورنر سندھ عمران اسماعیل کی حلف برداری کی تقریب کے بعد عشائیے میں مدعو نہ کرنے پر شدید غصے کا اظہار کیا تھا اور انہوں نے سندھ کی پارلیمانی پارٹی کا واٹس ایپ گروپ بھی چھوڑ دیا تھا۔دوسری جانب گورنر ہاوس اور پی ٹی آئی ذرائع کا کہنا ہے کہ عامر لیاقت کی ناراضگی بلاجواز ہے۔