جنرل ہسپتال میں فالج کی بیماری پر 2روزہ انٹر نیشنل کانفرنس ،

بیرون ملک سے ڈاکٹروں کی شرکت میڈیکل سائنس میں ترقی اور جدید ٹیکنالوجی کی بدولت برین ہیمرج کا علاج ممکن ہو گیا ‘ڈاکٹر عمیر رشید فالج سے فوری ریلیف کیلئے لوگوں میں بڑے پیمانے پر آگاہی مہم کی ضرورت ہے ‘غیر ملکی ڈاکٹرز کی گفتگو

جمعہ 7 دسمبر 2018 17:10

لاہور (اُردو پوائنٹ اخبارتازہ ترین - این این آئی۔ 07 دسمبر2018ء) پنجاب انسٹی ٹیوٹ آف نیورو سائنسز لاہور جنرل ہسپتال میں سالانہ کانفرنس کے انعقاد میں فالج کے مرض پر جدید طریقہ علاج ،تجربات اور ٹیکنالوجی سے مستفید ہونے کے بارے میں اظہار خیال کیا گیا جہاں فالج سینٹر ایل جی ایچ کے سربراہ ڈاکٹر عمیر رشید چوہدری ، امریکہ سے آئے ہوئے پروفیسر آ ف نیورو سرجری ڈاکٹر عدنان صدیقی ،عنصر طارق، احمد سوبری(ملائشیائ)، حسنین حیدر شاہ (دبئی)پروفیسر اُسامہ یاسین(مصر)یو ایس اے سے ریڈیالوجسٹ انصار رائے اور ڈاکٹر تنویر احمد سمیت ملک بھر سے سینئر ڈاکٹرز نے شرکت کی۔

ڈاکٹروں نے جنرل ہسپتال میں منعقدہ پریس کانفرنس سے خطاب کرتے ہوئے کہا کہ پاکستان ہمارا مادرِ وطن ہے جہاں آ کر دکھی انسانیت کیلئے بالخصوص فالج کے مرض کے حوالے سے دی جانے والی خدمات ہمارے لئے قابل فخر ہیں ۔

(جاری ہے)

انہوں نے کہا کہ نسوں کے ذریعے دوائی چھوڑ کر فالج کے اٹیک کو روکا جا سکتا ہے اب یہ مرض لا علاج نہیں اس کے ایک سے زیادہ علاج موجود ہیں جن پر نوجوان ڈاکٹرز کو آگے آنا چاہیے اور اس مرض سے بچاؤ کیلئے کردار ادا کرنا چاہیے۔

انہوں نے اس عزم کا اظہار کیا کہ وہ اپنے ذاتی اخراجات پر پاکستان میں ڈاکٹرز کی تربیت اور اُن کی سرپرستی کیلئے مزید اقدامات کریں گے تاکہ زیادہ سے زیادہ ڈاکٹرز اس شعبے میں متحرک ہو کر فالج جیسے پریشان کن مرض سے چھٹکارا دلا سکیں ۔اس موقع پر ڈائریکٹر ایڈمنسٹریشن رانا محمد شفیق، ڈاکٹر محمد فاروق، ڈاکٹر عمران، ڈاکٹر فاطمہ سمیت دیگر نیورو ریڈیالوجسٹ بھی موجود تھے۔

ڈاکٹرعمیر رشیدچوہدری نے کہا کہ فالج سے فوری ریلیف کیلئے لوگوں میں بڑے پیمانے پر آگاہی پیدا کرنے کی ضرورت ہے۔انہوں نے بتایا کہ گورنمنٹ سے فنڈز لیے بغیر اب تک ہونے والے پائلٹ پراجیکٹ میں35مریضوں کا علاج ہو چکا ہے ،انہوں نے سٹروک سینٹر کے آغاز کو خوش آئندقرار دیتے ہوئے کہا کہ پاکستان میں یہ اپنی نوعیت کا پہلا اور سرکاری شعبے میں واحد سینٹر ہے جبکہ ہمارے ہمسائیہ ملک میں ایسی18مراکز کام کر رہے ہیں ۔

پنجاب انسٹی ٹیوٹ آف نیورو سائنسز میں ہونے والی اس کانفرنس میں فالج کی بیماری پر ہونے والی تحقیق اور علاج معالجے کے جدید طریقوں پر روشنی ڈالی گئی ۔اس کانفرنس میں شریک ڈاکٹرز نے گہری دلچسپی کا اظہار کرتے ہوئے ڈاکٹر عمیر رشید کی خصوصی کاوشوں کو سراہا جبکہ سوال جواب کا سیشن بھی ہوا ۔