Live Updates

قومی غیر ت کیلئے خود انحصاری لازمی ، ہاتھ پھیلانے سے ملک آگے نہیں بڑھ سکتا :وزیر اعظم کا اپنے دفترمیں’’ایز آفس بزنس ڈوئنگ ‘‘ قائم کرنے کااعلان

میرا وژن ہے کہ پاکستان خود مختار بنے ، پاکستان کوغریب ملکوں کو امداد دینی چاہئے تھی باہر سے مدد مانگنے سے ملک کی عزت نفس مجروح ہوئی ، پاکستان اکنامک فورم سے خطاب

جمعرات 13 دسمبر 2018 22:52

قومی غیر ت کیلئے خود انحصاری لازمی ، ہاتھ پھیلانے سے ملک آگے نہیں بڑھ ..

اسلام آباد (اُردو پوائنٹ اخبارتازہ ترین - آن لائن۔ 13 دسمبر2018ء) وزیر اعظم عمران خان نے کہاہے کہ میرا وژن ہے کہ پاکستان خود مختار بنے ، پاکستان کوغریب ملکوں کو امداد دینی چاہئے تھی لیکن باہر سے مدد مانگنے سے ملک کی عزت نفس مجروح ہوئی ہے ، ہمیں دوسروں پر انحصار کرنا چھوڑنا پڑے گا ، ہاتھ پھیلانے سے ملک آگے نہیں بڑھ سکتا ، قومی غیرت کیلئے خود انحصاری لازمی ہے۔

تفصیلات کے مطابق پاکستان اکنامک فورم سے خطاب کرتے ہوئے وزیر اعظم نے کہا کہ 60کی دہائی میں پاکستان تیزی سے آگے بڑھ رہا تھا ، سرمایہ کاروں کو مجرموں کی طرح پیش کرنیوالے ترقی نہیں کر سکتے ، پیسہ کمانا گنا ہ نہیں بلکہ ناجائز طریقے سے پیسہ کمانا گناہے۔ انہوں نے کہا ایز آفس بزنس ڈوئنگ کے لئے میرے دفتر میں بنایا جائے گا ، برآمدات کو بڑھانا انتہائی ضروری ہے ، چین نے تیس سال میں 70کروڑ لوگوں کوغربت سے نکالاہے۔

(جاری ہے)

انہوں نے کہا کہ ہم نے سرمایہ کاروں کومحفوظ ماحول مہیاکرنا ہے ، در آمدات کوبڑھانے کی پوری کوشش کریں گے، برآمدات میں انتہائی کمی باعث شرم ہے ،منی لانڈرنگ کوروکنے کیلئے تمام تر اقدامات کئے جائیں گے ، منی لانڈرنگ اورسمگلنگ روکنے کیلئے حکومت پوری پالیسی لیکر آرہی ہے۔ ان کا کہنا تھا کہ تین چارماہ میں دیکھاہے کہ لوگ جغرافیائی اہمیت اور نوجوان آبادی کی وجہ سے پاکستان میں سرمایہ کاری کیلئے بڑی دلچسپی لے رہے ہیں، بلوچستان میں تانبے کے ذخائر ہیں ، بیرون ملک سے سرمایہ کاری کرنے والوں کیلئے آسانیاں پیدا کرناچاہتے ہیں ، اور سیز پاکستانیوں کیلئے بھی آسانیاں پیدا کررہے ہیں۔

وزیر اعظم نے کہا کہ آنیوالے دنوں میں ٹیکس کے حوالے سے آسانیاں پیدا کی جائیں گی ، اس کے لئے ایف بی آر اور پالیسی سازی کوالگ الگ کردیا گیاہے ،میں پاکستان بزنس کونسل سے الگ سے بھی ملاقات کروں گا اورسرمایہ کاروں سے مسلسل رابطے میں رہوں گا،سرمایہ کاروں کے تمام مسائل حل کریں گے۔ انہوں نے کہا کہ ملک کی آدھی آبادی غربت کاشکار ہے ، جب تک ایک معاشرے میں پیسہ بنانا آسا ن نہ ہوتو لوگ سرمایہ کاری کیلئے نہیں آتے ، انہوں نے کہا کہ ملک سے غربت ختم کرنے کیلئے ہمیں دولت پیدا کرنے کی ضرورت ہے۔