ملتان میں طوفانی بارش اور چھتیں گرنے سے چاربچے جاں بحق، 15 افراد زخمی

ملتان (اُردو پوائنٹ اخبارتازہ ترین - اے پی پی۔ 18 جون2019ء) ملتان اورگردونواح میں منگل کی علی الصبح موسلا دھارطوفانی بارش سے شہر اور مضافات میں چھتیں گرنے اور دیگر حادثات میں ابتدائی اطلاعات کے مطابق چار بچے جاں بحق جبکہ 15افراد زخمی ہوگئے ہیں۔ حکام کے مطابق بارش سے نشیبی علاقے زیر آب آٰگئے۔ ریسکیو 1122ذرائع کے مطابق زخمیوں کو نشترہسپتال اور تحصیل ہسپتال شجاع آ باد منتقل کردیاگیا ہے۔

گرج چمک اور ہلکی بارش کا سلسلہ پیرکی رات سے شروع ہوا جو وقفے وقفے سے رات گئے تک جاری رہا تاہم منگل کی صبح تین بجے طوفانی بارش شروع ہوگئی جوآدھ گھنٹہ جاری رہی۔ بارش سے کئی علاقوں میں برقی رو کی فراہمی بھی معطل ہوگئی۔ سورج کنڈ روڈ پر گھر کی دیوار، قصبہ مڑل میں مدرسے کی چھت گرنے اور چونگی نمبر11میں مکان کی دیوارگرنے سے اب تک کی اطلاعات کے مطابق چاربچے جاں بحق جبکہ چارخواتین اور بچوں سمیت 15افراد زخمی ہوگئے۔

(جاری ہے)

ریسکیو1122ذرائع کے مطابق سورج کنڈ روڈ پر پانچ بچے گلی میں کھیل رہے تھے کہ اچانک ان پر دیوارآگری جس کے نتیجے میں دوبچے جاں بحق ہوگئے جن کی عمریں پانچ پانچ سال تھی جبکہ تین بچے زخمی ہوگئے۔ دو زخمی بچو ں کونشترہسپتال منتقل کردیاگیا جبکہ ایک بچے کو موقع پر ہی طبی امداد فراہم کردی گئی۔ اسی طرح چونگی نمبر11میں مکان کے پردے کی دیوار ساتھ والے گھر میں جاگری جسً کے نتیجے میں تین سالہ عمیر اور دوسالہ ایان جاں بحق ہوگئے اور 45 سالہ زیتون بی بی، 40 سالہ پروین،20سالہ شاہینہ اور 5شالہ شمیم زخمی ہوگئے۔

شجاع آبا دکے علاقے قصبہ مڑل میں مدرسے کی چھت گرنے کے نتیجے میں 8 بچے ملبے تلے دب گئے۔ تین بچوں کو نشترہسپتال منتقل کردیاگیا، پانچ کو تحصیل ہسپتال شجاع آ باد منتقل کردیاگیا۔