اسپیکر اسمبلی کا علی وزیر اور محسن داوڑ کے پروڈکشن آرڈرز جاری نہ کرنے کا فیصلہ

اسلام آباد (اردوپوائنٹ اخبار تازہ ترین۔19جون2019) اسپیکر اسمبلی کا علی وزیر اور محسن داوڑ کے پروڈکشن آرڈرز جاری نہ کرنے کا فیصلہ، پی ٹی ایم کے دونوں رہنما قومی اسمبلی کے بجٹ سیشن کے اجلاس میں شرکت نہیں کر سکیں گے، تاہم آصف زرداری اور خواجہ سعد رفیق کے پروڈکشن آرڈرز جاری کر دیے گئے۔ تفصیلات کے مطابق اسپیکر قومی اسمبلی اسد قیصر نے پی ٹی ایم سے تعلق رکھنے والے اراکین قومی اسمبلی علی وزیر اور محسن داوڑ کے پروڈکشن آرڈرز جاری نہ کرنے کا فیصلہ کیا ہے۔

پی ٹی ایم کے دونوں رہنما قومی اسمبلی کے بجٹ سیشن کے اجلاس میں شرکت نہیں کر سکیں گے۔ دونوں رہنما پاک فوج پر حملے کے الزام میں گرفتار ہیں۔ تاہم دوسری جانب خواجہ سعد رفیق اور آصف علی زرادری کے پروڈکشن آرڈر جاری کر دیے گئے ہیں۔

(جاری ہے)

ذرائع کے مطابق دونوں رہنما کل ہونے والے قومی اسمبلی کے اجلاس میں شرکت کریں گے۔ گزشتہ روز بتایا گیا تھا کہ حکومت نے آصف علی زرادری اورخواجہ سعد رفیق کے پروڈکشن آرڈر جاری کرنے پر غور شروع کر دیا ہے۔

ذرائع نے بتایا تھا کہ حکومت اور اپوزیشن کے درمیان قومی اسمبلی کا اجلاس چلانے پر مفاہمت ہو گئی ہے اور اس کے بدلے میں حکومت نے آصف علی زرادری اور خواجہ سعد رفیق کے پروڈکشن آرڈر جاری کرنے پر غور شروع کر دیاہے۔ بتایا گیا تھا کہ حکومت آئندہ24سے48گھنٹے میں فیصلہ کر لے گی کہ حکومت نے آصف علی زرادری اور خواجہ سعد رفیق کے پروڈکشن آرڈر جاری کیے جائیں گے یا نہیں جبکہ ذرائع کا کہنا تھا کہ آئندہ24سے48گھنٹے میں پروڈکشن آرڈر جاری کیے جانے کا قوی امکان ہے۔

خیال رہے کہ آصف علی زرداری اس وقت نیب کی حراست میں ہیں اور پیپلز پارٹی نے ان کے پروڈکشن آرڈر جاری کرنے کا مطالبہ کررکھا تھا تا کہ وہ قومی اسمبلی کے اجلاس میں شریک ہو سکیں۔اس سے پہلے سپیکر قومی اسمبلی اسد قیصر نے نیب کی زیر حراست سابق صدر اور پاکستان پیپلز پارٹی کے شریک چئیرمین آصف علی زرداری کے پروڈکشن آرڈر جاری کرنے سے انکار کر دیا تھا۔

پاکستان پیپلز پارٹی کے رہنما خورشید شاہ سمیت دیگر نےاسپیکر قومی اسمبلی اسد قیصر سے ملاقات کی تھی اور آصف علی زرداری کے پروڈکشن آرڈر سے متعلق دریافت کیا جس پر اسپیکر قومی اسمبلی اسد قیصر نے آصف زرداری کے پروڈکشن آرڈر جاری کرنے سے انکار کر دیا تاہم اب دونوں رہنماؤں کے پروڈکشن آرڈر جاری کر دیے گئے ہیں اور اب دونوں رہنما کل ہونے والے قومی اسمبلی اجلاس میں شرکت کر سکیں گے۔