اپوزیشن جماعتوں کے نام نہاد آزادی مارچ کو مقبوضہ کشمیر کی موجودہ صورتحال سے توجہ ہٹانے کی سازش سمجھا جائے گا

پاکستان تحریک انصاف کے سینیٹر فیصل جاوید کی نجی ٹی وی سے بات چیت

بدھ 23 اکتوبر 2019 23:55

اسلام آباد ۔ (اُردو پوائنٹ اخبارتازہ ترین - اے پی پی۔ 23 اکتوبر2019ء) پاکستان تحریک انصاف (پی ٹی آئی) کے سینیٹر فیصل جاوید نے کہا ہے کہ اپوزیشن جماعتوں کے نام نہاد آزادی مارچ کو مقبوضہ کشمیر کی موجودہ صورتحال سے توجہ ہٹانے کی سازش سمجھا جائے گا۔ بدھ کو نجی ٹی وی سے بات چیت کرتے ہوئے انہوں نے کہا کہ وزیر اعظم عمران خان نے اقوام متحدہ کی جنرل اسمبلی (یو این جی ای) سمیت تمام بین الاقوامی فورمز پر مسئلہ کشمیر کو موثر انداز سے اجاگر کیا ہے۔

انہوں نے کہا کہ وزیر اعظم نے عالمی برادری پر زور دیا ہے کہ وہ مقبوضہ وادی میں انسانی حقوق کی سنگین خلاف ورزیوں اور خون خرابے کو روکنے کے لئے بھارت پر دباؤ ڈالے۔ انہوں نے مزید کہا کہ پی ٹی آئی حکومت کی جامع اور دانشمندانہ سفارتکاری کی وجہ سے پہلی مرتبہ مسئلہ کشمیر انٹرنیشنلائز ہوا۔

(جاری ہے)

فیصل جاوید نے کہا کہ عمران خان نے اقوام متحدہ کی جنرل اسمبلی میں خود کو صحیح معنوں میں امت مسلمہ کا سفیر ثابت کیا ہے۔

انہوں نے مزید کہا کہ جمیعت علمائے اسلام (جے یو آئی) ف کے سربراہ مولانا فضل الرحمان غیر ملکی ایجنڈے پر عمل پیرا ہیں۔ ایک سوال کے جواب میں انہوں نے پاکستان مسلم لیگ نواز اور پاکستان پیپلز پارٹی پر زور دیا کہ وہ سابق وزیر اعظم نواز شریف اور سابق صدر آصف علی زرداری کی صحت پر سیاست کرنے سے گریز کریں۔