جس طرح نواز شریف کیلئے ایئر ایمبولینس آئی، اسی طرح ایک اور ایئر ایمبولینس آنے والی ہے،نبیل گبول

حکومت کو آصف زرداری کو بھی باہر بھیجنا پڑے گا،ملک میں سسٹم کو لپٹتا ہوا دیکھ رہا ہوں،سابق وفاقی وزیر کی خصوصی گفتگو

بدھ 20 نومبر 2019 21:10

جس طرح نواز شریف کیلئے ایئر ایمبولینس آئی، اسی طرح ایک اور ایئر ایمبولینس ..

کراچی(اُردو پوائنٹ اخبارتازہ ترین۔ 20 نومبر2019ء) سابق وفاقی وزیر اورپاکستان پیپلزپارٹی کے رہنما نبیل گبول نے دعویٰ کیا ہے کہ جس طرح نواز شریف کیلئے ایئر ایمبولینس آئی، اسی طرح ایک اور ایئر ایمبولینس آنے والی ہے، حکومت کو آصف زرداری کو بھی باہر بھیجنا پڑے گا،ملک میں سسٹم کو لپٹتا ہوا دیکھ رہا ہوں۔خصوصی گفتگوکرتے ہوئے نبیل گبول نے کہا کہ سابق صدر آصف زرداری کے دل کی شریانیں بھی بند ہیں، حکومت کو انہیں بھی باہر بھیجنا پڑے گا، نواز شریف کی طرح ایک اور ایئر ایمبولینس آنیوالی ہے۔

سابق صدر آصف زرداری جعلی اکائونٹس کیس میں جون 2019 سے نیب کی تحویل میں ہیں جبکہ ان کی بہن فریال تالپور بھی زیر حراست اور شامل تفتیش ہیں۔سابق وفاقی وزیر نبیل گبول نے کہاکہ ملک میں سسٹم کو لپٹتا ہوا دیکھ رہا ہوں ۔

(جاری ہے)

لیاری سے تعلق رکھنے والے نبیل گبول پیپلزپارٹی سے ناراض ہونے کے بعد ایم کیو ایم میں شامل ہوگئے تھے، جہاں انہوں نے 2013 کے عام انتخابات میں انہیں متحدہ کے گڑھ عزیز آباد سے قومی اسمبلی کی نشست پر کامیابی حاصل کی تھی تاہم کچھ عرصہ بعد ہی انہوں نے استعفی دے کر ایم کیو ایم سے علیحدگی اختیار کرلی تھی۔