فاسٹ باﺅلر حسن علی فٹنس مسائل سے چھٹکارا نہ پاسکے

پیسر ری ہیب کررہے ہیں،امیدہے مکمل فٹ ہوکر اگلے میچز کیلئے دستیاب ہوں گے:پی سی بی

ذیشان مہتاب پیر 25 نومبر 2019 16:46

لاہور(اردو پوائنٹ تازہ ترین اخبار۔25نومبر2019ء) فاسٹ باﺅلر حسن علی فٹنس مسائل سے چھٹکارا نہ پا سکے جس کی وجہ سے وہ قائد اعظم ٹرافی کے 9ویں راﺅنڈ میچ میں بھی شامل نہیں ہیں ۔25سالہ حسن علی کا فٹنس حاصل کرنے کے لیے ری ہیب کا عمل طویل ہوتا جا رہا ہے جس کی وجہ سے وہ قائداعظم ٹرافی کے راﺅنڈ میچ میں خیبر پختونخوا کے خلاف سینٹرل پنجاب کی نمائندگی نہیں کر رہے۔

حسن علی ستمبر میں کمر کی تکلیف کا شکار ہوئے اور وہ سری لنکا کے خلاف ہوم سیریز جب کہ دورہ آسٹریلیا کے لیے قومی ٹیم میں شامل نہ ہو سکے۔

(جاری ہے)

انہوں نے نیشنل کرکٹ اکیڈمی میں میڈیکل سٹاف کی نگرانی میں ری ہیب میں بھی حصہ لیا لیکن بولر کمر کی تکلیف سے چھٹکارا پاکر 100 فیصد فٹ نہیں ہو سکے اور یہی وجہ ہے کہ کراچی میں شروع ہونے والے قائداعظم ٹرافی کے راﺅنڈ میچ میں بھی شریک نہیں ہوسکے جہاں سینٹرل پنجاب کی ٹیم خیبر پختونخوا کا سامنا کرے گی۔

پاکستان کرکٹ بورڈ کے مطابق حسن علی نے سینٹرل پنجاب کی ٹیم کو جوائن کر لیا ہے لیکن وہ ابھی مکمل فٹ نہیں ہیں، ٹیم کے فزیو کے ساتھ وہ ری ہیب کر رہے ہیں اور امکان ہے کہ 100 فیصد فٹنس کے بعد وہ آئندہ میچز کے لیے دستیاب ہوں گے۔