عمران خان کا ایجنڈا اصلاحات کا ہے، وکلاء سی پی سی بلز پر ہڑتال کی نظرثانی کریں اور اپنی تجاویز دیں،وفاقی وزیر اعظم خان سواتی

ہفتہ جنوری 20:09

عمران خان کا ایجنڈا اصلاحات کا ہے، وکلاء سی پی سی بلز پر ہڑتال کی نظرثانی ..
ایبٹ آباد۔ (اُردو پوائنٹ اخبارتازہ ترین - اے پی پی۔ 18 جنوری2020ء) وفاقی وزیر پارلیمانی امور سینیٹر اعظم خان سواتی نے کہا ہے کہ وزیر اعظم عمران خان کا ایجنڈا اصلاحات کا ہے، وکلاء سی پی سی بلز پر ہڑتال کی نظرثانی کریں اور اپنی تجاویز دیں، حکومتی اتحاد قائم ہے، ملک کیلئے خلوص نیت سے جدوجہد کر رہے، کرپشن معاشی اور معاشرتی اقدار کو ختم کر رہا ہے، اس ناسور کو ختم کئے بغیر ملک ترقی نہیں کر سکتا، نواز شریف کو بھی ادھورے مقدمات کا سامنا کرنے کیلئے واپس لائیں گے۔

وہ ہفتہ کو یہاں ڈسٹرکٹ بار ایسوسی ایشن ایبٹ آباد کی جدید ٹیکنالوجی سے آراستہ لائبریری اور ای لائبریری کی افتتاحی تقریب میں بطور مہمان خصوصی خطاب کر رہے تھے۔ تقریب میں کمشنر ہزارہ ڈویژن سید ظہیر السلام، صدر ڈسٹرکٹ بار ایسوسی ایشن اسد خان جدون اور عبدالعزیز تنولی نے بھی خطاب کیا۔

(جاری ہے)

وفاقی وزیر اعظم سواتی نے کہا کہ وکلاء عام آدمی کیلئے اٹھ کھڑے ہوتے ہیں، اپنی سوچ کو محدود نہ کریں اور انسانیت کیلئے کام کریں، ترقی یافتہ ممالک بالخصوص امریکہ میں 76 فیصد مقدمات دو وکلاء بیٹھ کر حل کرتے ہیں اور عدالت کے ججز صرف دن میں دو مقدمات سنتے ہیں جبکہ ہمارے ہاں ججز پر روزانہ 30 سے 35 مقدمات کا بوجھ ہو تا ہے، نظام میں اصلاحات لائے بغیر بہتری ممکن نہیں، ملک کو معاشی اور معاشرتی گرداب سے نکالنے کیلئے حکومت کا سہارا بنیں۔

انہوں نے کہا کہ یہ ملک انصاف کیلئے بنا ہے، ریاست اور عام آدمی میں ایک رشتہ ہے جو عبارت تک محدود ہے۔ انہوں نے کہا کہ وزیر اعظم عمران خان ملک کیلئے مخلص ہو کر جدوجہد کر رہے ہیں، نظام کی تبدیلی میں اصلاحات پر سینیٹ میں اکثریت نہ ہونے سے دشواری کا سامنا ہے جو 12 مارچ 2021ء تک برقرار رہے گا۔ انہوں نے اس امر پر تشویش کا اظہار کیا کہ نیب کرپشن کو ختم کرنے کیلئے بنا ہے، ملک کو بچانے کیلئے کرپشن ختم کرنا ہو گی۔

انہوں نے قبل ازیں ڈسٹرکٹ بار ایسوسی ایشن کی ای لائبریری کا افتتاح کیا اور صوبائی حکومت سے اور اپنی حیثیت میں ضروریات پوری کرنے کا عندیہ دیا اور خواتین وکلاء کیلئے لیب ٹاپ فراہم کرنے کا بھی اعلان کیا اور وکلاء کو سی پی سی اصلاحات میں ہڑتال پر نظرثانی کرنے، بہتری اور تحفظات کی تجاویز دینے پر زور دیا اور موجودہ ناکارہ سسٹم کو بدلنے میں وکلاء کو کردار ادا کرنے کی اپیل کی۔

قبل ازیں ڈیجیٹل لیب کی فائر علی راجہ نے ملٹی میڈیا بریفنگ دی اور صدر ڈسٹرکٹ بار ایسوسی ایشن اسد جدون نے اپنے خطاب میں کہا کہ وقت کے ساتھ بار کو جدید سہولیات سے آراستہ کر رہے ہیں تاکہ وکلاء جدید ریسرچ سے استفادہ حاصل کر سکیں، ای لائبریری کا قیام اسی سلسلہ کا ایک قدم ہے۔ انہوں نے وفاقی وزیر اعظم سواتی کی ہزارہ ڈویژن کیلئے علمی خدمات کو سراہا۔ انہوں نے وفاقی وزیر کو وکلاء کی ہڑتال پر روشنی ڈالتے ہوئے تجویز دی کہ وہ صوبائی حکومت کی قانون سازی اصلاحات پر حکومت وکلاء کی جانب سے تحفظات سے آگاہ کریں۔