لاہور اور آزاد کشمیر سمیت ملک کے مختلف علاقوں میں زلزلے کے شدید جھٹکے

لوگ خوف زدہ ہو کر گھروں اور عمارتوں سے باہر نکل آئے، ریکٹر اسکیل پر زلزلے کی شدت 5 تھی

محمد علی بدھ 26 فروری 2020 20:33

لاہور (اردو پوائنٹ تازہ ترین اخبار۔26فروری2020ء) لاہور اور آزاد کشمیر سمیت ملک کے مختلف علاقوں میں زلزلے کے شدید جھٹکے، لوگ خوف زدہ ہو کر گھروں اور عمارتوں سے باہر نکل آئے، ریکٹر اسکیل پر زلزلے کی شدت 5 تھی۔ تفصیلات کے مطابق لاہور، آزاد کشمیر اور ملک کے دیگر علاقوں میں بدھ کی شب کو زلزلے کے شدید جھٹکے محسوس کیے گئے ہیں۔ بتایا گیا ہے کہ زلزلے کے جھٹکے، آزاد کشمیر، خیبرپختوںخواہ، لاہور، شکرگڑھ اور پنجاب کے دیگر کچھ شہروں میں محسوس کیے گئے۔

زلزلے کے شدید جھٹکے محسوس کیے جانے پر لوگ خوفزدہ ہوگئے اور گھروں اور عمارتوں سے باہر نکل آئے۔ اس دوران لوگ مسلسل کلمہ طیبہ کا ورد کرتے رہے۔ بتایا گیا ہے کہ زلزلہ پیما مرکز کے مطابق ریکٹر سکیل پرزلزلے کی شدت 5ریکارڈ کی گئی، زلزلےکی گہرائی کم تھی اسی باعث زلزلے کے جھٹکوں کی شدت کچھ زیادہ محسوس ہوئی۔

(جاری ہے)

زلزلے کے باعث کسی جانی و مالی نقصان کی اطلاع نہیں ملی ہے ۔

یہاں یہ بات واضح رہے کہ پاکستان گزشتہ کچھ عرصے سے مسلسل زلزلوں کی زد میں ہیں۔ خاص کر ملک کے شمالی علاقہ جات مسلسل اور ہر کچھ دن بعد زلزلے کے شدید جھٹکوں کی زد میں رہتے ہیں۔ جبکہ یہ بھی واضح رہے کہ ماہرین پیشن گوئی کر چکے ہیں کہ رواں سال کے دوران پاکستان مسلسل شدید زلزلوں کی زد میں رہ سکتا ہے، اور ان زلزلوں کے باعث تباہی مچنے کے بھی خدشات ہیں۔