وزیراعظم عمران خان سے سعودی عرب کے نائب وزیر دفاع شہزادہ خالد بن سلمان بن عبدالعزیز کی ملاقات ‘ علاقائی اور بین الاقوامی صورتحال سمیت دو طرفہ تعلقات پر تبادلہ خیال

اسلام آباد (اُردو پوائنٹ اخبارتازہ ترین - اے پی پی۔ 02 مارچ2020ء) وزیراعظم عمران خان سے سعودی عرب کے نائب وزیر دفاع شہزادہ خالد بن سلمان بن عبدالعزیز نے ملاقات کی جس میں علاقائی اور بین الاقوامی صورتحال سمیت دو طرفہ تعلقات پر تبادلہ خیال کیا گیا۔ وزیراعظم آفس کی جانب سے جاری بیان کے مطابق وزیراعظم عمران خان نے سعودی نائب وزیر دفاع کا خیر مقدم کرتے ہوئے کہا کہ قریبی، نچلی سطح پر اور تاریخی روابط پر مبنی پاک سعودی عرب تعلقات خصوصی اہمیت کے حامل ہیں ۔

وزیراعظم عمران خان نے 2019ء میں سعودی ولی عہد شہزادہ محمد بن سلمان کے پاکستان کے تاریخی دورے اور خاص طور پر معاشی چیلنجز سے نمٹنے کیلئے سعودی عرب کی بھرپور معاشی مدد کا ذکر کیا۔ وزیراعظم عمران خان نے دونوں ممالک کے مابین بڑھتے ہوئے معاشی تعلقات اور متنوع شعبوں میں سرمایہ کاری کیلئے سعودی عزم کی تعریف کی۔

(جاری ہے)

وزیراعظم عمران خان نے بھارتی مقبوضہ کشمیر میں انسانی حقوق کی بگڑتی ہوئی صورتحال اور مسلمانوں پر بڑھتے ہوئے مظالم پر بھی روشنی ڈالی۔

وزیراعظم نے بھارتی قیادت کی جانب سے سخت بیان بازی اور جارحانہ اقدامات سے امن اور سلامتی کو لاحق خطرات کے حوالے سے زمینی حقائق سے بھی آگاہ کیا۔ انہوں نے جاری مظالم کی روک تھام اور مسئلہ کشمیر کے پرامن حل کو فروغ دینے کیلئے مسلم دنیا سمیت عالمی برادری کی اہمیت پر بھی زور دیا، او آئی سی کے اہم رکن کی حیثیت سے سعودی عرب کے کردار پر بھی تبادلہ خیال کیا۔

وزیراعظم عمران خان نے بھارت کے امتیازی سلوک سے متعلق ترمیمی ایکٹ اور نیشنل رجسٹر آف سٹیزن پر بھی روشنی ڈالی اور اس بات پر زور دیا کہ بھارتی حکومت اقلیتوں بالخصوص مسلمانوں کیخلاف امتیازی سلوک اور مذہب سے ہٹانے کیلئے منظم کوششوں میں مصروف ہیں، نئی دہلی میں مسلمانوں کی ٹارگٹ کلنگ، عبادت گاہوں کی بے حرمتی نہ صرف مسلم دنیا بلکہ عالمی برادری کیلئے بھی تشویش کا باعث ہے۔

وزیراعظم نے اس بات پر زور دیا کہ آر ایس ایس سے متعصب ہوکر بی جے پی حکومت ہندوتوا نظریہ کو آگے بڑھاتے ہوئے کشمیریوں پر ظلم کے ساتھ ساتھ ہندوستان میں اقلیتوں سے بھی امتیازی سلوک کر رہا ہے، عالمی برادری اس کو روکنے کیلئے اپنا کردار ادا کرے۔ سعودی نائب وزیر دفاع خالد بن سلمان بن عبدالعزیز نے وزیراعظم عمران خان کو سعودی قیادت کی جانب سے تہنیتی پیغام دیا اور مشرق وسطیٰ سمیت علاقائی امن واستحکام کیلئے پاکستان کے کردار کی تعریف کی۔

سعودی عرب اور پاکستان کے تزویراتی تعلقات کی اہمیت کو اجاگر کرتے ہوئے سعوی عرب کے نائب وزیر دفاع نے کہا کہ دونوں ممالک کے مابین برادرانہ تعلقات اور کثیرالجہتی تعاون کو مزید مضبوط کرنے کیلئے سعودی قیادت کے پختہ عزم سے بھی آگاہ کیا۔ انہوں نے اس بات کا اعادہ کیا کہ سعودی عرب اور پاکستان دیرپا شراکت دار کی حیثیت سے ہمیشہ ایک دوسرے کے ساتھ کھڑے رہیں گے۔