نہم و دہم کے جاری امتحانات شیڈول کے مطابق ہوں گے، چیئرمین فیڈ رل بورڈ آف انٹرمیڈیٹ اینڈ سیکنڈری ایجوکیشن

جمعہ 13 مارچ 2020 23:48

اسلام آباد ۔ (اُردو پوائنٹ اخبارتازہ ترین - اے پی پی۔ 13 مارچ2020ء) فیڈ رل بورڈ آف انٹرمیڈیٹ اینڈ سیکنڈری ایجوکیشن (ایف بی آئی ایس ای) کے چیئرمین اکرام علی ملک نے کہا ہے کہ بورڈ کے تحت جماعت نہم و دہم کے جاری امتحانات شیڈول کے مطابق ہوں گے۔

(جاری ہے)

ایف بی آئی ایس ای کی جانب سے جمعہ کو سماجی رابطوں کی ویب سائٹ ٹوئٹر پر ایک پیغام میں کہا گیا ہے کہ پنجاب، اسلام آباد اور خیبرپختونخوا میں بورڈ کے زیر انتظام جاری امتحانات مقررہ شیڈول کے مطابق ہوں گے تاہم دیگر تعلیمی سرگرمیاں 5 اپریل 2020ء تک ملتوی رہیں گی۔

اس حوالے سے وفاقی وزارت تعلیم و پیشہ وارانہ تربیت کی جانب سے بھی ایک ٹویٹ میں کہا گیا ہے کہ فیڈرل بورڈ آف انٹرمیڈیٹ اینڈ سیکنڈری ایجوکیشن کے تحت جاری امتحانات اسی طرح شیڈول کے مطابق ہوں گے تاہم 5 اپریل 2020ء تک کسی قسم کی دیگر تعلیمی سرگرمیاں نہیں ہوں گی۔