ترجمان گلگت بلتستان حکومت فیض اللہ فراق نے کورونا وائرس کی وجہ سے ایک شخص کی وفات کی تردید کردی

وفات پانے والے محمد وزیر کا انتقال کورونا کی وجہ سے نہیں نمونیا کی وجہ سے ہوا، مریض کی کورونا رپورٹ نیگیٹو آئی تھی: فیض اللہ فراق

عثمان خادم کمبوہ بدھ 18 مارچ 2020 20:15

گلگت (اُردو پوائنٹ اخبارتازہ ترین۔ 18 مارچ2020ء) ترجمان گلگت بلتستان حکومت فیض اللہ فراق نے کورونا وائرس کی وجہ سے ایک شخص کی وفات کی تردید کردی ہے۔ ترجمان گلگت بلتستان حکومت فیض اللہ فراق نے کہا ہے کہ وفات پانے والے 90 سالہ محمد وزیر کا انتقال کورونا کی وجہ سے نہیں نمونیا کی وجہ سے ہوا ہے۔ انہوں نے مزید بتایا ہے کہ محمد وزیر کی کوروناوائرس ٹیسٹ کی رپورٹ نیگیٹو آئی تھی اور مریض کو کورونا نہیں تھا۔

خیال رہے کہ اس سے قبل خبر آئی تھی کہ ) پاکستان میں کورونا وائرس کے پہلے مریض کی وفات کی تصدیق کردی گئی ہے۔ ٹی وی چینلز پر ترجمان گلگت بلتستان حکومت فیض اللہ فراق کے حوالے سے خبر چلائی جارہی تھی کہ انہوں نے تصدیق کی ہے کہ کورونا کی وجہ سے ایک شخص کا انتقال ہوگیا ہے تاہم اب انہون نے اس بات کی تردید کردی ہے۔

(جاری ہے)

اس سے قبل وزیر اعلیٰ گلگت بلتستان کے میڈیا کوآرڈینیٹر رشید ارشد نے بھی کہا تھا کہ گلگت میں کرونا مریض کی وفات کی خبر میں صداقت نہیں ہے مذکورہ مریض کی وفات کسی اور مرض سے ہوئی ہے۔

دوسری جانب سندھ میں مزید 9 اور پنجاب میںمز7 کیسز کے بعد آزاد کشمیر میں بھی کورونا وائرس کے ایک کیس کی تصدیق ہونے کے بعد ملک بھر میں کی مجموعی تعداد 297 ہو گئی ہے۔تفصیلات کے مطابق سندھ حکومت کے ترجمان مرتضیٰ وہاب نے بتایا کہ سکھر میں موجود زائرین میں سے 50 فیصد میں وائرس کی تصدیق ہوئی ہے جس کے بعد صوبے میں مجموعی تعداد 208 ہوگئی ہے، جن لوگوں کے ٹیسٹ مثبت آئے ان تمام افراد کو قرنطینہ میں شفٹ کردیا گیا ہے۔

مرتضیٰ وہاب نے بتایا کہ سکھر کے علاوہ سندھ میں 38 مریض ہیں، ان میں سے 2 صحت یاب ہونے کے بعد گھروں کو چلے گئے ہیں اور 36 مریض کو مختلف آئسولیشن وارڈ میں شفٹ کردیا گیا ہے۔انہوںنے کہاکہ سکھر میں کل 143 اور باقی سندھ میں 38 کیسز سامنے آئے جس سے مجموعی تعداد ۲۰۸ بنتی ہے، ہر شخص کو آئسولیشن میں رکھ دیا گیا ہے اور سندھ حکومت ہر پیشرفت شیئر کرے گی۔