امریکہ کورونا وائرس کا مرکز بن سکتا ہے

امریکہ میں 41 ہزار افراد کے کورونا وائرس سے متاثر ہونے کی تصدیق کر دی گئی

بدھ 25 مارچ 2020 00:58

نیو یارک (اُردو پوائنٹ اخبارتازہ ترین۔ 24 مارچ2020ء) امریکہ کورونا وائرس کا مرکز بن سکتا ہے، امریکہ میں 41 ہزار افراد کے کورونا وائرس سے متاثر ہونے کی تصدیق کر دی گئی۔ عالمی ادارہ صحت نے کہا ہے کہ امریکہ کورونا وائرس کا عالمی مرکز بن سکتا ہے ۔ اعداد و شمار سے ظاہر ہوا ہے وائرس سے امریکہ بری طرح متاثرہوا ہے۔ اس حوالے سے امریکی نائب صدر مائیک پنس نے کہا ہے کہ ملک بھر میں 3 لاکھ 13 ہزار افراد کے کورونا وائرس ٹیسٹ کئے گئے جن میں سے 41 ہزار افراد کے اس وائرس سے متاثر ہونے کی تصدیق ہوئی ہے۔

ایک رپورٹ کے مطابق وائٹ ہائوس میں پریس بریفنگ کے دوران بتایا کہ ملک بھر میں تمام لیبارٹریز کو ہدایت کر دی گئی ہے کہ وہ کورونا وائرس سے متعلق ٹیسٹوں کے نتائج سے سینٹرز فار ڈیزیز کنٹرول اینڈ پریونشن کو فوری آگاہ کریں۔

(جاری ہے)

امریکی صدر ڈونلڈ ٹرمپ نے ایک بیان میں کہا ہے کہ فیڈرل ایمرجنسی منیجمنٹ ایجنسی ملک بھر میں ڈاکٹروں اور طبی عملہ کو اسی لاکھ این۔

95 ماسک اور دیگر حفاظتی آلات فراہم کرے گی۔ انہوں نے کہا کہ ان اشیاء کا بڑا حصہ کورونا وائرس سے سب سے زیادہ متاثرہ ریاستوں واشنگٹن اور نیویارک کو فراہم کیا جائے گا۔امریکی صدر نے ایک ایگزیکٹو آرڈر کے ذریعے کورونا وائرس سے متاثرہ افراد کے علاج کے لئے درکار آلات اور دیگر متعلقہ اشیاء کی زخیرہ اندوزی پر پابندی بھی عائد کر دی ہے۔ واضح رہے کہ دنیا بھر میں کورونا وائرس سے اب تک 16 ہزار سے زائدافراد ہلاک ہو چکے ہیں جبکہ متاثرین افراد کی تعداد3 لاکھ 74 ہزار سے تجاوز کر گئی ہیں اور اب تک ایک لاکھ سے زیادہ افراد صحت یاب بھی ہو چکے ہیں۔