جنوبی پنجاب میں ایک نئی موٹروے کی تعمیر کی منظوری دے دی گئی

قومی اقتصادی کونسل کی انتظامی کمیٹی ایکنیک نے 12.43 ارب روپے لاگت سے این 5 موٹروے کے لودھراں ملتان سیکشن کی تعمیر کی منظوری دی

جمعہ 1 مئی 2020 23:22

اسلام آباد (اُردو پوائنٹ اخبارتازہ ترین - یکم مئی2020ء) جنوبی پنجاب میں ایک نئی موٹروے کی تعمیر کی منظوری دے دی گئی، قومی اقتصادی کونسل کی انتظامی کمیٹی ایکنیک نے 12.43 ارب روپے لاگت سے این 5 موٹروے کے لودھراں ملتان سیکشن کی تعمیر کی منظوری دی۔ تفصیلات کے مطابق قومی اقتصادی کونسل کی انتظامی کمیٹی ( ایکنیک) نے دیامربھاشا ڈیم پراجیکٹ (حصول اراضی وری سیٹلمنٹ) پراجیکٹ اور این فائیو موٹروے کے لودھراں ملتان سیکشن کی تعمیر سمیت چارمیگا منصوبوں کی منظوری دے دی ہے۔

بتایا گیا ہے کہ اس حوالے سے ایکنک کے اجلاس کی صدارت وزیراعظم کے مشیر برائے خزانہ ومحصولات ڈاکٹر عبدالحفیظ شیخ نے کی۔ اجلاس کے دوران این فائیو موٹروے کے لودھراں ملتان سیکشن کے دولین 62 کلومیٹر حصہ کی تعمیرسمیت چارمیگا منصوبوں کی منظوری دی گئی۔

(جاری ہے)

این فائیو موٹروے کے لودھراں ملتان سیکشن کی تعمیرپر12.43 ارب روپے کی لاگت آئے گی، اس منصوبہ میں دوفلائی اورز، دو انٹرچینجز، اور4 چھوٹے پل شامل ہیں۔

اجلاس میں پنجاب کے 11 کم ترقی یافتہ اضلاع کیلئے پنجاب ہیومن کیپٹل انویسٹمنٹ پراجیکٹ کی بھی منظوری دی گئی، اس منصوبہ پر32 ارب روپے کی لاگی آئیگی۔ ایکنیک نے خیبرپختونخوا ایری گیٹڈ ایگری کلچرانویسٹمنٹ پراجیکٹ (کے پی آئی اے آئی پی ) کی منظوری بھی دی، یہ منصوبہ خیبرپختونخواکے تمام 26 اضلاع کیلئے ہے اوراس پر30 ارب روپے کی لاگت آئے گی۔اجلاس میں دیامربھاشاڈیم پراجیکٹ (حصول اراضی وری سیٹلمنٹ) پراجیکٹ کی اصولی منظوری دی گئی، اس منصوبہ پر175.43 ارب روپے کی لاگت آئیگی۔ اجلاس میں وزارت منصوبہ بندی کو پراجیکٹ کے اخراجات ، تنخواہیں و الاونسز کو مزید معقول بنانے کی ہدایت بھی کی گئی۔