آئندہ چوبیس گھنٹوں میں پنجاب سمیت ملک کے دیگر علاقوں میں موسم گرم اور خشک رہے گا، محکمہ موسمیات

جمعہ 22 مئی 2020 16:50

لاہور (اُردو پوائنٹ اخبارتازہ ترین - اے پی پی۔ 22 مئی2020ء) محکمہ موسمیات کے مطابق آئندہ چو بیس گھنٹوں میں پنجاب سمیت ملک کے دیگر علاقوں میں موسم گرم اور خشک رہے گا۔ تاہم شام یا رات کے اوقات میں گوجرنوالہ، لاہور، ساہیوال ، سیالکوٹ ،راولپنڈی، چکوال، ٹیکسلا، اٹک، جنڈ، لاوہ، گوجرخان، کوٹلی ستیاں،جھنگ ، گجرات، سرگودھا، میانوالی ،بھکر،فیصل آباد اور مری میں بھی آندھی اور گرج چمک کے ساتھ ہلکی بارش متوقع ہے۔

محکمہ موسمیات کے مطابق چوبیس گھنٹوں کے دوران بلوچستان ،زوب ، شیرانی ، قلعہ سیف اللہ ،اور لورالائی میں آندھی اور گرج چمک کے ساتھ بارش متوقع ہے، صوبہ سندھ کے بیشتر اضلاع میں موسم شدید گرم اور خشک رہے گا،سکھر اور لاڑکانہ میں گرد آلود ہوائیں چلنے کی توقع ہے،خیبرپختونخوا صوبہ کے بیشتر اضلاع میں موسم خشک اور گرم ر ہے گا۔

(جاری ہے)

شام یا رات کے دوران میں دیر، چترال ، سوات ، مانسہرہ ، کوہاٹ ،ایبٹ آباد، مالاکنڈ،وادی پشاور ، خیبر، بونیر، مردان، نوشہرہ، کرم ، باجوڑ،کوہستان ، بٹگرام ، صوابی اور چارسدہ میں آندھی اور گرج چمک کے ساتھ بارش متوقع ہے،گلگت بلتستان اور کشمیر میں بھی آندھی اور گرج چمک کے ساتھ بارش کی توقع ہے۔

گذ شتہ روز ملک کے بیشتر علاقوں میں زیادہ سے زیادہ درجہ حرارت 43 ڈگری سینٹی گریڈ رہا،لاہور شہر میں جمعہ کے روز صبح کے وقت کم سے کم درجہ حرارت 28 ڈگری سینٹی گریڈ ریکارڈ کیا گیا،صبح کے وقت ہوا میں نمی کا تناسب 35 فیصد ریکارڈ کیا گیا ، محکمہ موسمیات کے مطابق آج بروز ہفتہ اوراتوار کے روز بھی لاہور شہر کا موسم گرم اورخشک رہنے کا امکان ہے۔جبکہ اسلام آباد میں دن کے اوقات میں موسم گرم اور خشک رہیگا، شام یا رات کے اوقات میں آندھی اور گرج چمک کے ساتھ بارش کی توقع ہے ۔