اقوام متحدہ ، اسلامی تعاون کی تنظیم اوآئی سی ، عالمی رہنمائوں اور سفارتی مشنز کا پی آئی اے کے مسافربردارطیارے کے حادثہ میں قیمتی انسانی جانوں کے نقصان پرگہرے رنج وغم کا اظہار

اسلام آباد ۔ (اُردو پوائنٹ اخبارتازہ ترین - اے پی پی۔ 22 مئی2020ء) اقوام متحدہ ، اسلامی تعاون کی تنظیم اوآئی سی ، عالمی رہنمائوں اورپاکستان میں غیرملکی سفارتی مشنز نے پی آئی اے کے مسافربردارطیارے کے حادثہ میں قیمتی انسانی جانوں کے نقصان پرگہرے رنج وغم کا اظہارکیاہے۔جمعہ کو لاہورسے کراچی جانیوالی پی آئی اے کی پرواز پی کے 8303 کے حادثہ میں 100 سے زائد افرادجاں بحق اورزمین پرمتعدد افراد زخمی ہوئے ہیں ۔

بھارت کے وزیراعظم نریندرامودی ،کینیڈاکے وزیراعظم جسٹن ٹروڈو، افغانستان کے صدراشرف غنی، نیپال کے وزیراعظم کے پی شرما اولی، ترکی کے وزیر خارجہ مولوت کاوسگلو، پاکستان میں امریکہ، چین، فرانس، نیدرلینڈ، اوریورپی یونین نے طیارے کے حادثہ میں انسانی جانوں کے نقصان پرگہرے رنج وغم اورزخمیوں کی جلد صحت یابی کی دعاکی ہے۔

(جاری ہے)

اسلامی تعاون کی تنظیم اوآئی سی نے کراچی میں طیارے کے حادثہ میں قیمتی انسانی جانوں کے نقصان پرگہرے رنج وغم کااظہارکیاہے۔

تنظیم کے سیکرٹری جنرل ڈاکٹریوسف العثمین نے اپنے تعزیتی بیان میں غم زدہ خاندانوں ، پاکستان کی حکومت اورعوام سے تعزیت، افسوس اورہمدردی کا اظہارکیاہے۔ انہوں نے مرحومین کے ایصال ثواب، اہل خانہ کیلئے صبرجمیل اورزخمیوں کی جلد صحت یابی کی دعا بھی کی۔اقوام متحدہ کے سیکرٹری جنرل انٹونیوگوئتریش نے طیارہ کے حادثہ کوانہتائی ناخوشگواراورالمناک قراردیتے ہوئے واقعہ پراپنے گہرے رنج وغم کااظہارکیاہے۔

نیویارک میں معمول کی پریس بریفنگ کے دوران اے پی پی کے سوال پرسیکرٹری جنرل کے ترجمان نے کہاکہ اقوام متحدہ مشکل کی اس گھڑی میں پاکستان کی حکومت ، عوام اورغم زدہ خاندانوں کے ساتھ ہیں، انہوں نے کہاکہ یہ حادثہ ایک ایسے وقت میں ہواہے جب عیدالفطرکاتہوارمنایا جارہاہے، انہوں نے متاثرہ خاندانوں ، پاکستان کی حکومت اورعوام کے ساتھ تعزیت اورافسوس کااظہارکیا۔

بھارت کے وزیراعظم نریندرامودی نے ٹوئٹرپرجاری پیغام میں کہاہے کہ پاکستان میں طیارے کے حادثہ میں انسانی جانوں کے نقصان پرانہیں افسوس ہواہے،انہوں نے جاں بحق ہونے والے افراد کے اہل خانہ اورزخمیوں کی جلد صحت یابی کی دعاکی ہے۔افغانستان کے صدراشرف غنی نے اپنے پیغام میں کہاہے کہ وہ مرنے والے افراد کے خاندانوں کے غم میں شریک ہیں، انہوں نے حادثہ میں ہونے والے جانی نقصان پرغمزدہ خاندانوں اورپاکستان کی حکومت اورعوام سے تعزیت کااظہارکیا، انہوں نے کہاکہ غم کی ایک گھڑی میں افغان عوام پاکستان کے ساتھ ہیں۔

نیپال کے وزیراعظم کے پی شرمااولی نے طیارہ حادثہ پرپاکستان کی حکومت اورغم زدہ خاندانوں کے ساتھ افسوس اورتعزیت کااظہارکیاہے، انہوں نے زخمیوں کی جلد صحت یابی کی دعابھی کی ہے۔ پاکستان میں چینی سفارت خانہ نے اپنے تعزیتی پیغام میں غمزدہ خاندانوں کے ساتھ گہرے رنج وغم کااظہارکیاہے۔بیان میں کہاگیاہے کہ چین دکھ کی اس گھڑی میں پاکستان کے ساتھ ہیں۔

پاکستان میں امریکا کے ناظم الامورپال جونز نے اپنے بیان میں کہا ہے کہ امریکی مشن کی طرف سے وہ پاکستان کے عوام اورغم زدہ خاندانوں کے ساتھ تعزیت کا اظہارکرتے ہیں۔ ترکی کے وزیرخارجہ نے اپنے تعزیتی پیغام میں حادثہ پرافسوس کااظہارکرتے ہوئے کہاہے کہ وہ پاکستانی بہنوں اوربھائیوں کے غم میں شریک ہیں ، پاکستانی بہنوں اوربھائیوں کاغم اوردرد ہمارا غم اوردرد ہیں ، انہوں نے مرنے والوں کی ایصال ثواب اورزخمیوں کی جلد صحت یابی کی دعا بھی کی۔

یورپی یونین کے سفیراندرولا کامی نارا، ہالینڈ کے سفیر واوٹرپلومپ، اورپاکستان میں فرانسیسی سفارت خانہ نے بھی اس حادثہ پراپنے گہرے رنج وغم کااظہارکیاہے، انہوں نے غم دہ خاندانوں کے ساتھ تعزیت اورزخمیوں کی جلد صحت یابی کی دعا کی ہے۔ پاکستان میں جاپان کے سفیرمسٹوڈا کونینوری نے کراچی میں طیارے کے حادثہ میں قیمتی جانی نقصان پر گہرے دکھ اور افسوس کا اظہار کیا ہے۔

اپنے تعزیتی بیان میں انہوں نے کہا کہ طیارے کے حادثے کی المناک خبر سن کر انہیں دلی صدمہ ہوا ہے وہ سوگوار خاندانوں کے غم میں برابر کے شریک ہیں۔کینیڈاکے وزیراعظم جسٹن ٹروڈو نے ٹوئٹرپرپیغام میں کہاہے کہ پاکستان سے آنیوالی خبریں افسوسناک اورپریشان کن ہیں، ہم اس سانحہ میں مرنے والے افراد کے اہل خانہ اورعزیزواقارب کے غم میں برابرکے شریک ہیں، کینیڈاکے عوام دکھ کی اس گھڑی میں پاکستان کے عوام کے ساتھ ہیں۔

پاکستان میں فلسطین کے سفیر احمد رباعی نے طیارہ حادثہ میں ہونے والے جانی نقصان پرگہرے رنج وغم کااظہارکیاہے، اپنے تعزیتی بیان میں انہوں نے کہاکہ فلسطین دکھ اورالم کی اس گھڑی میں اپنے پاکستانی بہنوں اوربھائیوں کے ساتھ ہیں، انہوں نے کہا کہ یہ ایک بڑاسانحہ ہے ۔ انہوں نے جاں بحق ہونے والے افراد کے ایصال ثواب، اہل خانہ کیلئے صبرجمیل اورزخمیوں کی جلد صحت یابی کی دعا کی ہے۔