ڈیرہ اسماعیل خان، بیٹی کے ساتھ ناجائز تعلقات کے شبہ میں نوجوان فائرنگ سے قتل

ہفتہ 23 مئی 2020 16:54

ڈیرہ اسماعیل خان (اُردو پوائنٹ اخبارتازہ ترین - اے پی پی۔ 23 مئی2020ء) غیرت کے نام پر قتل کا اندوہناک واقعہ، مسلح شخص نے بیٹی کے ساتھ ناجائز تعلقات کے شبہ میں نوجوان کو اندھادھند فائرنگ کرکے موت کے گھاٹ اتار دیا ،ملزم موقع سے فرارہونے میں کامیاب ،ملزم کے خلاف قتل کا مقدمہ درج کرلیاگیا۔

(جاری ہے)

تھانہ درابن کی حدود علاقہ گرہ مدہ میں مسلح شخص نے نوجوان محمد رضوان کو اندھا دھند فائرنگ کرکے قتل کردیا اور موقع سے فرار ہوگیا ،مقتول کی لاش کو ہسپتال منتقل کیاگیا جہاں پوسٹمارٹم کے بعد لاش ورثا کے حوالے کردی گئی۔

مقتول محمد رضوان کے والد رمضان خان نے پولیس کو بتایا کہ اس کا بیٹا گندم کی کٹائی کے بعد تھریشر پر گندم صاف کرنے کے لئے علاقہ گرہ مدہ کے قریب اراضی احمد خان گیاہوا تھا جہاں پر ملزم مسلح بہ اسلحہ وہاں آیا اور بیٹے کو فائرنگ کرکے قتل کردیا ہے ،مقتول کے والد نے پولیس کو وجہ عداوت یہ بیان کی کہ میرے بیٹے کے ملزم کی بیٹی کے ساتھ تقریباًچار سال سے دوستانہ تعلقات تھے۔ پولیس نے مقتول کے والد کی رپورٹ پر ملزم کے خلاف قتل کا مقدمہ درج کرکے اس کی تلاش شروع کردی ہے۔