بحرین اور اسرائیل کے درمیان امن معاہدے کے اعلان کے خلاف فلسطینیوں کی ریلی

مقبوضہ بیت المقدس (اُردو پوائنٹ اخبارتازہ ترین۔ 13 ستمبر2020ء) بحرین اور اسرائیل کے درمیان امن معاہدے کے اعلان کے خلاف فلسطینیوں کی ریلی۔ متحدہ عرب امارات کے بعد بحرین کے بھی اسرائیل کے ساتھ تعلقات معمول پر لانے کے اعلان کے بعد فلسطینی عوام شدید غم و غصے میں مبتلا، غزہ میں امن معاہدوں کے خلاف احتجاج میں اسرائیل، امریکہ، بحرین اور متحدہ عرب امارات کے رہنماؤں کی تصاویر جلا دیں۔

تفصیلات کے مطابق فلسطینی عوام نے متحدہ عرب امارات کے بعد بحرین کے بھی اسرائیل کے ساتھ تعلقات بحال کرنے کے فیصلے کو مسترد کر دیا ہے۔ الجزیرہ کے مطابق غزہ میں ہونے والا احتجاجی مظاہرہ حماس کی جانب سے منعقد کیا گیا جس میں شرکاء کی تعداد بھی کوئی قابل ذکر نہیں تھی، محض چند درجن افراد اس احتجاج کا حصہ بنے تھے جس میں امریکی صدر اور اسرائیلی وزیر اعظم کے ساتھ بحرین اور متحدہ عرب امارات کے سربراہ کی تصاویر جلائی گئیں۔

(جاری ہے)

فلسطینی حکام کا کہنا ہے کہ ہم تعلقات کی بحالی والے وائرس سے لڑیں گے اور اس کو ہر ممکنہ کوشش کر کے روکیں گے، تاکہ اس کی افزائش ہونے سے روک لی جائے۔ واضح رہے کہ دو عرب ممالک کی جانب سے اسرائیل کو تسلیم کیے جانے کو فلسطینی عوام دھوکہ تصور کرتے ہیں۔ اس سے قبل بحرین کے اسرائیل سے تعلقات قائم کرنے کے اعلان کی فلسطینی اتھارٹی نے مذمت کرتے ہوئے بحرین سے احتجاجاََ اپنا مندوب واپس بلا لیا تھا۔