راجن پور میں ظالم شخص نے غیرت کے نام پر بہن کو ذبح کر ڈالا

راجن پور (اُردو پوائنٹ اخبارتازہ ترین۔ 16 ستمبر2020ء) راجن پور میں ظالم شخص نے غیرت کے نام پر بہن کو ذبح کر ڈالا، ملزم واردارت انجام دینے کے بعد موقع سے باآسانی فرار ہو گیا، پولیس نے واقعے کا مقدمہ درج کر لیا۔ تفصیلات کے مطابق راجن پور میں غیرت کے نام پر ایک لڑکی کے قتل کی خوفناک واردات ہوئی۔ میڈیا رپورٹس کے مطابق ضلع راجن پور میں بھائی نے غیرت کے نام پر بہن کو تیز دھار آلے سے قتل کر دیا۔

غیرت کے نام پر قتل کا واقعہ راجن پورکی بستی جسکانی میں پیش آیا۔ پولیس کی جانب سے بتایا گیا ہے کہ غلام عباس نامی ملزم نے اپنی بہن کو تیز دھار آلے سے سے قتل کر دیا اور پھر باآسانی فرار بھی ہوگیا۔ لڑکی کے قتل کی اطلاع ملنے پر پولیس نے جائے وقوعہ پہنچ کر لاش کو ہسپتال منتقل کیا۔

(جاری ہے)

ہسپتال میں لڑکی کا پوسٹ مارٹم کیا جائے گا جس کی رپورٹ شامل تفتیش ہوگی۔

  پولیس نے قتل کا مقدمہ درج کر کے ملزم کی تلاش شروع کردی ہے۔ پولیس کا کہنا ہے کہ ابتدائی معلومات کی بنیاد پر ملزم غلام عباس کیخلاف غیرت کے نام پر قتل کا مقدمہ درج کیا گیا ہے۔ پولیس کا دعویٰ ہے کہ ملزم کو جلد گرفتار کر لیا جائے اور اسے سخت سے سخت سزا دلوائی جائے گی۔ واضح رہے کہ پنجاب میں غیرت کے نام پر قتل اور زیادتی کے واقعات میں تشویش ناک حد تک اضافہ ہوا ہے۔ ایسے گھناونے جرائم میں تشویش ناک اضافے کے بعد حکومت سے مطالبہ کیا جا رہا ہے کہ موثر قانون سازی کر کے ملزموں کو سخت سے سخت سزا دی جائے۔ ملزمان کو سخت سزائیں دیے بنا ایسے جرائم کی روک تھام ممکن نہیں ہے۔