اپوزیشن افراتفری و انتشار کی بجائے تعمیری سیاست کرے،صوبائی وزیر صنعت

وزیر اعظم عمران خان نے ملک کو بحرانوں سے نکال کر ترقی و خوشحالی کی راہ پر ڈال دیا،میاں اسلم اقبال

جمعرات 24 ستمبر 2020 17:01

اپوزیشن افراتفری و انتشار کی بجائے تعمیری سیاست کرے،صوبائی وزیر صنعت

لاہور۔ (اُردو پوائنٹ اخبارتازہ ترین - اے پی پی۔ 24 ستمبر2020ء) صوبائی وزیر صنعت و تجارت میاں اسلم اقبال نے کہا ہے کہ وزیر اعظم عمران خان نے ملک کو بحرانوں سے نکال کر ترقی کی راہ پرڈال دیا ہے،پرامن، خوشحال اور کرپشن سے پاک نیاپاکستان ہماری منزل ہے،سیاست کوذاتی مفادات کیلئے استعمال کرنے والی اپوزیشن افراتفری کے ذریعے عوام کیلئے مشکلات پیدا کرنا چاہتی ہے۔

ان خیالات کا اظہار انہوںنے گزشتہ روز اپنے کیمپ آفس میں پارٹی عہدیداروں اور کارکنوں سے خطاب کرتے ہوئے کیا۔انکا کہنا تھا کہ قومی وسائل کی لوٹ مار سے بیرون ممالک محلات کھڑے کرنے والوں کے عزائم سے عوام آگاہ ہیں،غریب قوم کی محنت کی کمائی پر ہاتھ صاف کرنے والوں کے منہ سے عوام کی ہمدردی کی باتیں جچتی نہیں۔

(جاری ہے)

صوبائی وزیر نے کہا کہ ترقی کے نام پر دھوکہ دینے والے سابق حکمرانوں نے ملک اور قوم پر بڑا ظلم کیا،پہلے قومی وسائل کو لوٹااور اب لوٹی ہوئی دولت بچانے کیلئے اکٹھے ہوگئے ہیں،قومی دولت کے ان لٹیروں کا احتساب ہر پاکستانی کے دل کی آواز ہے۔

میاں اسلم اقبال نے کہا کہ عوام نے 2018کے انتخابات میں جھوٹ، منافقت اور کرپشن کی سیاست کا باب ہمیشہ کیلئے بند کردیا،اپوزیشن افراتفری اور انتشار کی بجائے تعمیری سیاست کرے۔ صوبائی وزیر نے کہا کہ پاکستان تحریک انصاف کی حکومت کاہر قدم قوم کے روشن مستقبل کی جانب بڑھ رہا ہے۔عوام کی محرومیوں کو خوشیوں میں بدلنے کیلئے انقلابی فلاحی پروگرام کامیابی سے جاری ہیں۔ انہوں نے کہا کہ حکومت گرانے کے خواب دیکھنے والوں کو ترقی کرتا اور مضبوط ہوتا ہواپاکستان گوارا نہیں، لیکن عوام ملک کی ترقی چاہتے ہیں، وہ کسی کو بھی ترقی کے سفر میں حائل نہیں ہونے دینگے۔