علامہ اقبال اوپن یونیورسٹی اپنے طلبہ کو انکی دہلیز پر تعلیم دلانے کے لئے ہر ممکن کوشش کررہی ہے

اسلام آباد (اُردو پوائنٹ اخبارتازہ ترین - اے پی پی۔ 06 اکتوبر2020ء) : علامہ اقبال اوپن یونیورسٹی جدید کمیونیکیشن ٹیکنالوجی کے استعمال کو بروئے کار لاتے ہوئے اپنے طلبہ کو انکی دہلیز پر تعلیم دلانے کے لئے ہر ممکن کوشش کررہی ہے۔ اس ضمن میں یونیورسٹی نے حال ہی میں میٹرک ایف اے اور بی اے پروگراموں کی تمام درسی کتب کی سافٹ کاپیز تیار کرکے اپنی ویب سائٹ پر اپ لوڈ کرکے تمام متعلقہ طلبائ کو ان کی فراہمی یقینی بنادی ہے۔

طلبہ اپنی کتابیں ویب سائٹ (www.aiou.edu.pk)پر کتابوں والی آپشن سے ڈاون لوڈ کرسکتے ہیں۔وائس چانسلر پروفیسر ڈاکٹر ضیائ القیوم کی ہدایت پر یونیورسٹی دوسرے پروگراموں کی کتب کی سافٹ کاپیز تیار کرنے پر بھی کام کررہی ہے۔یہاںیہ بات قابل ذکر ہے کہ یونیورسٹی اپنے طلبہ کو کتابوں کی ہارڈ کاپیزبھی بذریعہ ڈاک ان کے گھروں کو ارسال کررہی ہے۔

(جاری ہے)

ملک کے طول و عرض میں موجود یونیورسٹی کے لاکھوں طلبہ کو ویب سائٹ پر کتب دستیاب کرانا یونیورسٹی کا ایک اور بڑا کارنامہ ہے اور اس اقدام سے طلبہ کی جانب سے کتب نہ ملنے کی شکایات کا خاتمہ ہوگا۔

وائس چانسلر نے تدریسی امورکی مینول سے آٹومیشن پر منتقلی ڈیجیٹلائزیشن کو پہلی ترجیح رکھا ہے جس کا بنیادی مقصد طلبہ کو تیز رفتار بنیادوں پر خدمات کی فراہمی کو یقینی بنانا ، امور میں شفافیت اور تعلیمی معیار میں اضافہ کرنا ہے۔علاوہ ازیں سمسٹر خزاں 2020ئ سے یونیورسٹی کے شعبہ فاصلاتی و غیر رسمی تعلیم نے چھ ماہ دورانیہ کے شارٹ کورسسز کا اجرائ کردیا ہے۔

یہ کورسسز لٹریسی۔نان فارمل ایجوکیشن۔ زندگی کی مہارتیں۔تدریسی معاونات کا استعمال اور امتحان/جائزہ کی مہارتوں پر مبنی ہیں۔اس کے علاوہ الائٹ کے تعاون سے گلگت اور سکردو میں ٹیلرنگ اور مستری کے کام کی مہارتوں پر مبنی کورسسز کا اجرائ بھی کردیا گیا ہے۔یہ تمام کورسز وائس چانسلر پروفیسر ڈاکٹر ضیائ القیوم کی خصوصی دلچسپی کا مظہر ہیں۔چئیرمین غیر رسمی تعلیم ڈاکٹر محمد اجمل نے کہا ہے کہ یہ کورسز آن لائن پڑھائے جائیں گے اور ان کی کتب بھی آن لائن دستیاب ہیں۔کورسز کی تفصیل پراسپکٹس ، داخلہ فارم اور دیگر معلومات یونیورسٹی کی ویب سائٹ www.aiou.edu.pkپر موجود ہیں۔ داخلے کی آخری تاریخ 15۔اکتوبر مقرر ہے۔