دربند پولیس نے برادڑ میں جواں سالہ لڑکی کے بہیمانہ قتل کیس میں نامزد تین ملزمان کو اسلحہ سمیت گرفتار کر لیا

ہفتہ 17 اکتوبر 2020 14:25

مانسہرہ (اُردو پوائنٹ اخبارتازہ ترین - اے پی پی۔ 17 اکتوبر2020ء) : دربند پولیس نے برادڑ میں جواں سالہ لڑکی کے بہیمانہ قتل کیس میں نامزد تین ملزمان کو اسلحہ سمیت گرفتار کر لیا۔

(جاری ہے)

تفصیلات کے مطابق تین روز قبل ملزمان نے تھانہ دربند کے علاقہ برادڑ میں اپنے گھر میں موجود ایک لڑکی ارم شہزادی کو فائرنگ کر کے قتل کر دیا تھا جس کی ایف آئی آر بابر ولد تاج محمد، علی خان ولد یعقوب، عمران ولد علی خان اور شکیل ولد اورنگزیب کے خلاف درج ہوئی تاہم ملزمان ارتکاب جرم کے بعد فرار ہو گئے۔

ڈی ایس پی سرکل اوگی مراد علی وزیر کی زیر قیادت ایس ایچ او تھانہ دربند طاہر اقبال اور آئی ایچ سی محمد ارشد خان نے دیگر نفری کے ہمراہ پورے علاقہ کی ناکہ بندی اور چھاپوں کا سلسلہ شروع کیا جس پر تین ملزمان علی خان، شکیل اور عمران بالآخر پولیس کے ہاتھ آ گئے جنہیں تھانہ منتقل کر دیا گیا، ملزمان سے دو پستول بھی برآمد ہوئے جبکہ ایک ملزم بابر ابھی تک روپوش ہے۔