فرانس میں گستاخانہ خاکوں کی تشہیر کیخلاف ملک گیر ہڑتال کیلئے مشاورت شروع کر دی ‘ اشرف بھٹی

لاہور/کراچی/اسلام آباد/سیالکوٹ/گوجرانوالہ/فیصل آباد/حافظ آباد( این این آئی ) آل پاکستان انجمن تاجران نے فرانس میںگستاخانہ خاکوںکی تشہیر کی شدیدمذمت کرتے ہوئے کہا ہے کہ تاجر تنظیموں نے عالمی سطح پر احتجاج ریکارڈکرانے کے لئے ملک گیر ہڑتال کیلئے مشاورت شروع کردی ہے ، پاکستانی حکومت فی الفور سفارتی تعلقات منقطع کرکے فرانس کے سفیر کو ملک بدر کرے ورپاکستانی سفیر کو واپس بلایا جائے ،حکومتی سطح پر فرانس کی ہرقسم کی مصنوعات کے بائیکا ٹ کابھی اعلان کیا جائے۔

آل پاکستان انجمن تاجران کا ہنگامی اجلاس مرکزی صدراشرف بھٹی کی صدارت میں ان کے دفتر میں منعقد ہوا ۔ اجلاس میںمرکزی سیکرٹری جنرل محبوب سرکی،لاہور کے صدر میاںطارق فیروز،سینئر نائب صدر نعیم بادشاہ،مختلف مارکیٹوں کے صدور فعت سلیم ،ملک ناظم،میاں سلیم،حاجی سعید،شیخ ارشد،خواجہ ندیم سمیت دیگر نے شرکت کی ۔

(جاری ہے)

اشرف بھٹی نے کہا کہ فرانس کی جانب سے حکومت کی سطح پر گستاخانہ حرکت کی گئی ہے جس پر پوری امت مسلمہ سراپا احتجاج ہے۔

پاکستان امت مسلمہ میں اہمیت رکھتا ہے اس لئے فرانس سے صرف زبانی مذمت کافی نہیںبلکہ حکومت پاکستان اس ناپاک حرکت پر فوری طو رپر فرانس سے اپنے سفارتی تعلقات منقطع کرے ، ترکی ،سعودی ،ملائیشیاء سمیت دیگر مسلمان ممالک میں وفود روانہ کرکے اس پر متفقہ حکمت عملی بنائی جائے ۔ انہوںنے کہا کہ پاکستانی شہریوں نے اپنے طور پر فرانس کی مصنوعات کے مکمل بائیکاٹ کااعلان کردیا ہے لیکن اس مہم کو نتیجہ خیز بنانے کیلئے حکومت کی سطح پر اس کا باضابطہ اعلان کیا جاناچاہیے اور یہ بائیکاٹ اس وقت تک جاری رہناچاہیے جب تک فرانس اس واقعہ پرباضابطہ معافی اور ذمہ داروںکے خلاف کارروائی نہیں کرتا ۔

علاوہ ازیں دوسرے صوبوں اور مختلف اضلاع کے تاجررہنمائوں نے بھی مرکزی صدراشرف بھٹی سے ٹیلیفونک رابطہ کر کے اس واقعہ کے خلاف احتجاج کے حوالے سے حکمت عملی پر تبادلہ خیال کیا ۔