جے ڈی سی فاونڈیشن کی جانب سے عالمی میلاد مصطفیؐکانفرنس کا انعقاد

عاشقان مصطفی ؐنے ایک لاکھ چراغ روشن کر کے عالمی ریکارڈ قائم کردیا جے ڈی سی نے ہر مذہب و مسلک کوایک اسٹیج پر جمع کر کے وحدت کی اعلیٰ مثال قائم کر دی، مفتی گلزارنعیمی امت کا یکجا ہونا وقت کی اہم ترین ضرورت ہے،عامر خان، قوم نے اکٹھے ہو کر یکجہتی کی اعلیٰ مثال قائم کردی،قاری اللہ داد

اتوار 8 نومبر 2020 18:35

کراچی (اُردو پوائنٹ اخبارتازہ ترین - این این آئی۔ 08 نومبر2020ء) جے ڈی سی فاونڈیشن پاکستان کی جانب سے عالمی میلاد مصطفی صلی اللہ علیہ وآل وسلم کانفرنس کا انعقاد کیا گیا۔ کانفرنس میں تمام مکاتب و مذاہب سمیت سیاسی و سماجی شخصیات نے شرکت کی۔کانفرنس سے خطاب کرتے ہوئے معروف عالم دین قاری اللہ داد نے کہا کہ ایک ہی وقت میں ایک اسٹیج پر مسلمان،ہندو، عیسائی اور سکھ رہنمائوں نے آقا صلی اللہ علیہ وآل وسلم کے نام پر اکٹھاہو کر دنیا کو بتا دیا ہے کہ ہم سب ایک ہیں۔

رہنما ایم کیو ایم پاکستان عامر خان نے کہا کہ آج کے پر آشوب دور میں سب کا یکجا ہونا وقت کی اہم ترین ضرورت ہے۔ مفتی گلزار احمد نعیمی نے اظہار خیال کرتے ہوئے کہا کہ جے ڈی سی نے مشکل ترین حالات میں ہر مذہب و مسلک سمیت تمام سیاسی جماعتوں کے رہنماوں کوایک اسٹیج پر جمع کر کے وحدت کی اعلیٰ مثال قائم کر دی ہے۔

(جاری ہے)

اس کانفرنس میں مولانا جعفر الحق تھانوی،مفتی محمد مکرم قادری،قاری اللہ داد،مولانا گلزار نعیمی،رہنما جمیعت علمائے اسلام ف مولانا سلیم اللہ ترکی، ہندو رہنما وجے لال مہاراج، سینئر سیاستدان ڈاکٹر فاروق ستار، رہنما ایم کیو ایم پاکستان عامر خان، ایم این اے پاکستان تحریک انصاف عالمگیر خان، ق لیگ سندھ کے صدر طارق حسن،الیکٹرونکس مارکیٹ کے صدر رضوان عرفان،مطلوب اعوان،فیصل رضاعابدی، وسیم بادامی،نعت خواںحسان بن خورشید،علامہ منظرالحق تھانوی سمیت مختلف مکاتب فکر کے لوگوں نے شرکت کی۔

اس موقع پر عاشقان مصطفی صلی اللہ علیہ وآلہ وسلم نے ایک لاکھ چراغ روشن کر کے عالمی ریکارڈ قائم کیا۔جنرل سیکریٹری جے ڈی سی فائونڈیشن نے تمام شرکاء کا شکریہ اداکیا۔