Live Updates

سونے کی فی تولہ قیمت ساڑھے 4 ماہ کی کم ترین سطح پر آگئی

ملکی صرافہ مارکیٹوں میں پیر کے روز سونے کی قیمت میں 1 ہزار روپے سے زائد کی کمی ریکارڈ کی گئی

muhammad ali محمد علی پیر نومبر 21:50

سونے کی فی تولہ قیمت ساڑھے 4 ماہ کی کم ترین سطح پر آگئی
کراچی (اُردو پوائنٹ اخبارتازہ ترین۔ 30 نومبر2020ء) سونے کی فی تولہ قیمت ساڑھے 4 ماہ کی کم ترین سطح پر آگئی، ملکی صرافہ مارکیٹوں میں پیر کے روز سونے کی قیمت میں 1 ہزار روپے سے زائد کی کمی ریکارڈ کی گئی۔ تفصیلات کے مطابق مقامی صرافہ مارکیٹوں میں پیر کو فی تولہ سونے کی قیمت 1150روپے کی نمایاں کمی سے ایک لاکھ 8ہزار850روپے ہوگئی۔ صرافہ اینڈ جیولرز ایسوسی ایشن کے مطابق گزشتہ روز عالمی مارکیٹ میں فی اونس سونا15ڈالرکی کمی سے 1772ڈالر ہو گیا جس کے زیر اثر ملکی صرافہ مارکیٹوں میں بھی پیر کے روز سونے کی قیمت میں کمی کا رجحان رہااور ایک تولہ سونے کی قیمت1150روپے کی کمی سے 1لاکھ 8ہزار850روپے ہو گئی۔

اسی طرح986روپے کی کمی سے دس گرام سونے کی قیمت 93ہزار 321روپے کی سطح پر آگئی۔

(جاری ہے)

بتایا گیا ہے کہ پاکستان میں اگست 2020ء میں سونے کی فی تولہ قیمت 1 لاکھ 32 ہزار روپے کی بلند ترین تک پہنچ گئی تھی۔ اس کے بعد سونے کی قیمت میں کمی آنا شروع ہوئی۔ گزشتہ 4 ماہ کے دوران سونے کی قیمت میں اتار چڑھاؤ جاری رہا۔ اگست کے وسط کے بعد سے اب تک سونے کی فی تولہ قیمت میں مجموعی طور پر 24 ہزار 150 روپے کی کمی واقع ہوچکی ہے۔

کرونا وائرس کی وباء کے دوران لوگوں کی جانب سونے میں غیر معمولی سرمایہ کاری کی گئی جس کی وجہ سے دنیا بھر میں سونے کی قیمت میں مسلسل اضافہ ہوا۔ تاہم اب کرونا ویکسین کی کی تیاری کی خبروں کے بعد سونے کی قیمتوں میں مسلسل کمی آ رہی ہے۔ کچھ عرصہ قبل بین الاقوامی مارکیٹ میں سونے کی فی اونس قیمت 2054 ڈالر کی ریکارڈ سطح تک پہنچ گئی تھی، جو اب کم ہو کر 1772ڈالر تک آ چکی ہے۔ امکان ظاہر کیا جا رہا ہے کہ آنے والے دنوں میں سونے کی قیمتوں میں مزید کمی دیکھنے کو ملے گی۔
                                            
کرونا وائرس کی دوسری لہر سے متعلق تازہ ترین معلومات