Live Updates

محمد عامر نے مجھے کہا تم لوگ ہماری جوتی کے نیچے ہو اور وہیں رہو گے:افغان کرکٹر نوین الحق کا دعوی

میں ہمیشہ نصیحت لینے ،عزت دینے کیلئے تیار ہوں،کرکٹ ایک جینٹل مین گیم ہے لیکن کوئی آپکو یہ کہے کہ تم لوگ ہماری جوتی کے نیچے ہو اور وہیں رہوگے تو وہ نہ صرف میری بلکہ میرے لوگوں کی بھی بات کررہا ہوتا ہے:فاسٹ بائولر کا ٹویٹ

ذیشان مہتاب بدھ 2 دسمبر 2020 13:06

محمد عامر نے مجھے کہا تم لوگ ہماری جوتی کے نیچے ہو اور وہیں رہو گے:افغان ..

لاہور (اردو پوائنٹ تازہ ترین اخبار ۔ 2دسمبر 2020ء ) لنکن پریمیئر لیگ کے دوران قومی کرکٹر محمد عامر سے تلخ کلامی کرنے والے افغان کرکٹر نوین الحق نے دعوی کیا ہے کہ پاکستان فاسٹ بائولر نے ان کی قوم کے بارے میں توہین آمیز الفاظ استعمال کیے تھے۔ قومی کرکٹر محمد عامر سے تلخ کلامی کا واقعہ سری لنکا میں جاری لنکن پریمیئر لیگ کے دوران اس وقت پیش آیا جب کینڈی ٹسکرز کے افغان بولر نے گال گلیڈی ایٹرز کی جانب سے کھیلنے والے محمد عامر پر طنز کیا۔

میچ ختم ہوتے ہی دونوں کھلاڑیوں کے درمیان تلخ جملوں کا تبادلہ ہوا تاہم آمنے سامنے آنے پر دیگر کھلاڑیوں اور امپائر نے دونوں کو دور کیا اور معاملہ ختم کروایا۔ میچ کے بعد دونوں ٹیمیں آپس میں مصافحہ کرنے لگیں تو نوین الحق کے قریب آنے پر شاہد آفریدی کی مسکراہٹ غصے میں تبدیل ہوگئی اور آفریدی نے نوین الحق کو گھورتے ہوئے کچھ کہا جس پر افغان کھلاڑی خاموشی سے آگے بڑھ گیا۔

(جاری ہے)

شاہد آفریدی نے افغان کھلاڑی کی محمد عامر سے تلخ کلامی سے متعلق ٹویٹ کرتے ہوئے کہا کہ ’’میں نوجوان کھلاڑیوں کو ایک مشورہ دوں گا کہ آرام سے گیم کھیلیں اور بدکلامی سے پرہیز کریں، افغانستان کرکٹ ٹیم میں میرے بہت سے دوست ہیں اور ہمارے تعلقات بھی خوشگوار ہیں، ساتھی کھلاڑیوں اور حریف ٹیم کی عزت کرنا کھیل کا بنیادی اصول ہے‘‘۔

My advise to the young player was simple, play the game and don't indulge in abusive talk. I have friends in Afghanistan team and we have very cordial relations. Respect for teammates and opponents is the basic spirit of the game. https://t.co/LlVzsfHDEQ
— Shahid Afridi (@SAfridiOfficial) December 1, 2020

شاہد آفریدی کے اس ٹویٹ کے جواب میں نوین الحق نے ٹویٹ کیا کہ’’ میں ہمیشہ نصیحت لینے اور عزت دینے کے لیے تیار ہوں،کرکٹ ایک جینٹل مین گیم ہے لیکن کوئی آپ کو یہ کہے کہ تم لوگ ہماری جوتی کے نیچے ہو اور وہیں رہو گے تو وہ نہ صرف میری بلکہ میرے لوگوں کی بھی بات کررہا ہوتا ہے‘‘۔

Always ready to take advice and give respect,Cricket is a gentleman’s game but if someone says you all are under our feet and will stay their then he is not only talking about me but also talking abt my ppl. #give #respect #take #respect
— Naveen ul haq Murid (@imnaveenulhaq) December 1, 2020