حکومت کی جانب سے پاکستانی کوہ پیما محمد علی سدپارہ کے بیٹے کو سرکاری نوکری دینے کا اعلان

گلگت (اُردو پوائنٹ تازہ ترین اخبار۔ 23 فروری 2021ء) حکومت کی جانب سے پاکستانی کوہ پیما محمد علی سدپارہ کے بیٹے کو سرکاری نوکری دینے کا اعلان۔ تفصیلات کے مطابق گلگت بلتستان حکومت کی جانب سے کے ٹو سر کرنے کی کوشش میں جاں بحق ہو جانے والے پاکستانی کوہ پیما علی سدپارہ کے اہل خانہ کیلئے اہم فیصلہ کیا گیا ہے۔ گلگلت بلتستان حکومت کے فیصلے کے مطابق علی سدپارہ کے صاحبزادے ساجد سدپارہ کو محکمہ سیاحت میں نوکری فراہم کی جائے گی۔

جبکہ ساجد سدپارہ کے والد کو اعلیٰ سول اعزاز سے بھی نوازا جائے گا۔ اس کے علاوہ علی سدپارہ کی بیوہ کو 30 لاکھ روپے کی مالی امداد بھی ادا کی جائے گی۔ حکومت گلگت بلتستان نے محمد علی سدپارہ کی خدمات کا اعتراف کرتے ہوئے محمد علی سدپارہ انسٹیٹیوٹ فار ایڈونچر سپورٹس، ماونٹئرنگ اینڈ راک کلائمبنگ بنانے کا فیصلہ بھی کیا ہے۔

(جاری ہے)

محمد علی سدپارہ کے بیٹے ساجد علی سدپارہ کو کوہ پیمائی میں بین الاقوامی سطح کی تربیت دلوئی جائے گی جس کے بعد وہ انسٹیٹیوٹ فار ایڈونچر سپورٹس، ماونٹئرنگ اینڈ راک کلائمبنگ میں کوہ پیمائی کی تربیت دیں گے۔

یاد رہے کہ موسم سرما کے دوران کے ٹو سر کرنے کی مہم جوئی کے دوران علی سد پارہ اور دو غیر ملکی کوہ پیما 5 فروری کو لاپتہ ہوگئے تھے۔ کوہ پیماؤں کا آخری مرتبہ رابطہ 8 ہزار 2 سو میٹر بلندی پر بوٹل نک سے ہوا تھا۔ جس کے بعد کئی روز تک ان کی تلاش کی گئی لیکن کوئی سُراغ نہیں مل سکا تھا۔ بعد ازاں 18 فروری کو گلگت بلتستان کے وزیر سیاحت ناصر علی خان نے پریس کانفرنس کرتے ہوئے کہا تھا کہ حکومت ،پاک فوج اور محمد علی سدپارہ کے لواحقین اب اس نتیجے پر پہنچ چکے ہیں کہ پاکستانی کوہ پیما اب اس دنیا میں نہیں رہے ۔

گلگت بلتستان کی حکومت نے اسکردو ائیرپورٹ کو علی سدپارہ کے نام سے منسوب کرنے ، مایہ ناز کوہ پیما کے نام سے کوہ پیمائی کی تربیت کے لیے اسکول قائم کرنے بھی تجویز دی تھی۔ ان کا کہنا تھا کہ حکومت قومی ہیرو کی خدمات کو سلام پیش کرتے ہیں۔ علی سدپارہ کے بچوں کی مالی اور اخلاقی معاونت کی جائے گی جب کہ انہیں سکالر سپش بھی دی جائیں گی۔