اسرائیلی فورسز کا ایک بار پھر مسجد اقصیٰ میں نمازیوں پر حملہ

اسرائیلوں فورسز کے حملے کے نتیجے میں جمعہ پڑھنے کے لیے آئے متعدد نمازی زخمی ہو گئے

Muqadas Farooq مقدس فاروق اعوان جمعہ 18 جون 2021 16:19

اسرائیلی فورسز کا ایک بار پھر مسجد اقصیٰ میں نمازیوں پر حملہ
غزہ (اردو پوائنٹ تازہ ترین اخبار۔18جون 2021ء) اسرائیلی فورسز نے ایک بار پھر مسجد اقصیٰ پر حملہ کر دیا،اسرائیلی فورسز کے حملے کے نتیجے میں جمعہ پڑھنے کے لیے آئے متعدد نمازی زخمی ہو گئے ۔تفصیلات کے مطابق اسرائیل کے فلسطینیوں پر مظالم کم نہ ہوئے،ایک مرتبہ پھر جمعہ کی نماز پڑھنے کے لیے آنے والے نمازیوں پر حملہ کر دیا۔انٹرنیشنل میڈیا کے مطابق اسرائیلی فورسز کی جانب سے کیے گئے حملے میں کئی نمازی زخمی ہو گئے ہیں۔

اسرائیلی فورسز اور نہتے فلسطینوں کے مابین لڑائی کی ویڈیو ز بھی سوشل میڈیا پر آ گئی ہیں۔اسرائیلی فورسز نے مسجد اقصیٰ کے ایک گارڈ پر بھی تشدد کیا اور تشدد کے بعد حراست میں لے لیا۔
علاوہ ازیں آج اسرائیلی فوج نے سیز فائر کی خلاف ورزی کرتے ہوئے ایک بار پھر غزہ پر بمباری کی ہے۔

(جاری ہے)

عرب میڈیا کے مطابق اسرائیلی طیاروں نے ایک بار پھر سیز فائر کی خلاف ورزی کرتے ہوئے دوسرے روز بھی غزہ پر بمباری کی جس میں متعدد عمارتوں کو نشانہ بنایا گیا تاہم ابھی تک فضائی حملے میں کسی جانی نقصان کی کوئی اطلاع نہیں ملی، فلسطینی مزاحمتی گروپ حماس کے ترجمان کا کہنا تھا کہ بمباری اسرائیل کی نئی حکومت کی کارروائی ہے تاہم ہم اسرائیلی بربریت کے خلاف اپنی مزاحمت جاری رکھیں گے۔

اسرائیلی طیاروں کی بمباری کے بعد حماس کی جانب سے بھی بھاری ہتھیاروں سے اسرائیل پر فائرنگ کی گئی۔ دوسری جانب اسرائیلی فوج کا کہنا ہے کہ حماس نے غزہ سے آتش گیر غبارے اسرائیلی کی جانب چھوڑے جس کے جواب میں کارروائی کی گئی۔واضح رہے کہ گزشتہ ماہ اسرائیلی لڑاکا طیاروں نے 11 روز تک غزہ پر مسلسل بمباری کی تھی جس کے نتیجے میں 250 سے زائد فلسطینی شہید ہوگئے تھے تاہم اردن نے ثالثی کا کردار ادا کرتے ہوئے حماس اور اسرائیل کے درمیان سیز فائر معاہدہ طے کروایا تھا۔