Live Updates

مسلم لیگ ن کے سینئر رہنما کا ساتھیوں سمیت ق لیگ میں شمولیت کا اعلان

پی پی 164 سے معروف سیاسی شخصیات نے ن لیگی امیدوار پنجاب اسمبلی چودھری زین شوکت کی سربراہی میں پرویزالٰہی سے ملاقات کی اور پاکستان مسلم لیگ ق میں شمولیت کا اعلان کیا، ذرائع

Danish Ahmad Ansari دانش احمد انصاری اتوار 25 جولائی 2021 21:02

مسلم لیگ ن کے سینئر رہنما کا ساتھیوں سمیت ق لیگ میں شمولیت کا اعلان
لاہور (اُردو پوائنٹ، اخبار تازہ ترین، 25جولائی 2021) ق لیگ نے مسلم لیگ ن کو زور دار جھٹکا دے دیا، مسلم لیگ ن کے سینئر رہنما ے ساتھیوں سمیت ق لیگ میں شمولیت کا اعلان کر دیا۔ تفصیلات کے مطابق پی پی 164 سے معروف سیاسی شخصیات نے ن لیگی امیدوار پنجاب اسمبلی چودھری زین شوکت کی سربراہی میں سپیکر پنجاب اسمبلی چودھری پرویزالٰہی اور صوبائی جنرل سیکرٹری سینیٹر کامل علی آغا سے ملاقات کی اور پاکستان مسلم لیگ ق میں شمولیت کا اعلان کیا ہے۔

چودھری پرویزالٰہی نے کہا کہ ہم نے ہمیشہ ملک و قوم کی ترقی کیلئے بے لوث خدمت کا جذبہ رکھنے والی شخصیات کو آگے آنے کا موقع فراہم کیا ہے۔ اس وقت پاکستان بڑے مشکل دور سے گزر رہاہے۔اسے معاشی طور پر مستحکم کرنے کیلئے سب کو باہمی اختلافات بھلا کر ملک کی ترقی کیلئے اپنا اپنا کردار ادا کرنا ہو گا۔

(جاری ہے)

انہوں نے کہا کہ اکیلا فرد کچھ نہیں کر سکتا، پاکستان کا نام عالمی سطح پر بلند کرنے کیلئے تمام جماعتوں کو کارکردگی دکھانا ہو گی اور قومی سلامتی کے اداروں کے ہاتھ مضبوط کرنا ہوں گے۔

ن لیگی سابق رہنما چودھری زین شوکت ڈگراں نے چودھری پرویزالٰہی کا شکریہ ادا کرتے ہوئے کہا کہ ہمیں چودھری شجاعت حسین اور چودھری پرویزالٰہی کی قائدانہ صلاحیتوں پر بھرپور اعتماد ہے، پارٹی مجھے جوبھی ذمہ داری سونپے گی اس پر پورا اتروں گا۔ اس مو قع پر گفتگو کر تے ہو ئے سپیکر پنجاب اسمبلی نے کہا کہ مخالفت میں نہیں ملک کی خدمت میں ہم سب کو ایک دوسرے سے آگے بڑھنا ہو گا۔عوام خوشحال ہوں گے تو پاکستان ترقی کرے گا۔کورونا کی چوتھی لہر پہلے سے بھی زیادہ خطرناک شکل اختیار کر چکی ہے، تمام لوگ اس سے بچاؤ کیلئے ویکسین لگوائیں اور ایس او پیز پر عمل کریں۔         
Live پاکستان میں کرونا وائرس کی چوتھی لہر سے متعلق تازہ ترین معلومات