Live Updates

وزیر اعظم نے مون سون شجرکاری مہم کا آغاز کردیا

آنے والی نسل کے لیے بہتر ملک چھوڑ کر جانا چاہتے ہیں، عمران خان عوام ملک کے جنگلات کا احاطہ بڑھانے کے لیے درختوں کی شجرکاری مہم میں بھرپور حصہ لیں، وزیر اعظم کی درخواست

پیر 26 جولائی 2021 17:49

وزیر اعظم نے مون سون شجرکاری مہم کا آغاز کردیا

اسلام آباد (اُردو پوائنٹ اخبارتازہ ترین - این این آئی۔ 26 جولائی2021ء) وزیر اعظم عمران خان نے اسلام آباد میں ملک بھر میں مون سون شجرکاری مہم کا آغاز کردیا۔مہم کے آغاز کی تقریب سے خطاب کرتے ہوئے وزیر اعظم نے عوام سے کہا کہ وہ ملک کے جنگلات کا احاطہ بڑھانے کے لیے درختوں کی شجرکاری مہم میں بھرپور حصہ لیں۔انہوں نے کہا کہ یہ بدقسمتی ہے کہ دیگر علاقائی ممالک کے مقابلے میں ہمارے جنگلات کا احاطہ بہت کم ہے کیونکہ ماضی میں اس معاملے کو نظر انداز کیا گیا۔

انہوںنے کہاکہ ہمیں گلوبل وارمنگ سے لڑنے اور آلودگی کے اثرات کو ختم کرنے کے لیے پاکستان کو سرسبز بنانا ہوگا۔وزیر اعظم نے کہا کہ اگر اگلے تین ہفتوں کے دوران ہر فرد کم از کم ایک پودا لگائے تو بہت بڑا انقلاب آئے گا۔

(جاری ہے)

انہوںنے کہاکہ انہوں نے کمشنرز اور ڈپٹی کمشنرز کو بھی ہدایت کی ہے کہ وہ شہروں میں خالی جگہوں پر پودے لگانے کو یقینی بنائیں۔

انہوں نے کہا کہ ہمارا مقصد آنے والی نسلوں کے لیے بہتر پاکستان چھوڑنا ہے۔عمران خان نے کہا کہ 10 ارب درختوں کے سونامی منصوبے کے ساتھ ساتھ خیبر پختونخوا میں ایک ارب درخت لگانے کے منصوبے کی پوری دنیا میں وسیع پیمانے پر تعریف کی گئی ہے۔انہوں نے کہا کہ پاکستان کو اب ایک سرکردہ ملک کے طور پر تسلیم کیا گیا ہے جو کاربن کے اخراج کو ریورس کرنے کے لیے اقدامات کر رہا ہے۔

قبل ازیں وزیر اعظم نے اسلام آباد کے سیکٹر ایف 9 میں فاطمہ جناح پارک میں پودا لگایا تاکہ عوام کو درختوں کی شجرکاری مہم میں مکمل طور پر حصہ لینے کی ترغیب ملے۔میڈیا رپورٹ کے مطابق وزارت ماحولیاتی تبدیلی کے زیر اہتمام 10 ارب درخت سونامی کے ایک حصے کے طور پر ملک گیر سرگرمی کے طور پر مون سون کے بارش کے موسم میں جاری ہے۔آئندہ چند ہفتوں میں کیپٹل ڈیویلپمنٹ اتھارٹی (سی ڈی ای) اسلام آباد میں ساڑھے 5 لاکھ درخت لگائے گی۔

خیال رہے کہ گزشتہ دو دہائیوں کے دوران اسلام آباد میں درختوں کے احاطے میں بڑے پیمانے پر کمی دیکھنے میں آئی ہے تاہم وزیر اعظم عمران خان کی حکومت کی جانب سے کلین اینڈ گرین پاکستان انیشی ایٹو کے تحت بڑے پیمانے پر درختوں کی شجرکاری مہم چلانے کے بعد گرین گراف آہستہ آہستہ اوپر جارہا ہے۔