24 گھنٹے کام کرنے والے ویکسین سینٹر کی کل تعداد 12 ہوگئی

کراچی (اُردو پوائنٹ اخبارتازہ ترین - این این آئی۔ 02 اگست2021ء) حکومتِ سندھ نے کراچی میں 24گھنٹے کام کرنیوالے مزید11ویکسین سینٹرز قائم کردیے، 24 گھنٹے کام کرنے والے ویکسین سینٹر کی کل تعداد 12 ہوگئی۔کراچی میں ایکسپو سینٹر کے علاوہ مزید گیارہ ویکسی نیشن سینٹرز نے کام شروع کردیا، کراچی، حیدر آباد اور سندھ کے دوسرے شہروں میں ویکسی نیشن کے لیے مراکز پر رش بڑھنے لگا۔

(جاری ہے)

ایکسپو سینٹر پر ویکسی نیشن کیلئے عوام کے شدید رش کے بعد حکومتِ سندھ نے ایک بڑا فیصلہ کرتے ہوئے مزید 11 ویکسین سینٹر قائم کیے ہیں جہاں 24 گھنٹے عوام کو ویکسین لگائی جائے گی۔محکمہ صحت سندھ نے عوام کی سہولت کیلئے جن اسپتالوں میں 24گھنٹے ویکسی نیشن سہولت فراہم کی ہیں ان میں ضلع وسطی میں سندھ گورنمنٹ چلڈرن اسپتال، سندھ گورنمنٹ لیاقت آباد اور سندھ گورنمنٹ اسپتال نیو کراچی ، ضلع شرقی میں ایکسپو سینٹر، اوجھا اسپتال، ضلع جنوبی میں خالق دینا ہال، جناح اسپتال اور لیاری جنرل اسپتال، ضلع غربی میں سندھ گورنمنٹ قطر اسپتال، ضلع ملیر میں مراد میمن گوٹھ اسپتال اور ضلع کورنگی میں سندھ گورنمنٹ گورنگی نمبر پانچ اور سندھ گورنمنٹ اسپتال سعود آباد 2 شامل ہیں۔