علامہ اقبا ل اوپن یو نیورسٹی ایبٹ آباد میں طلبہ کو انٹرنیٹ سہولتیں فراہم کریں گے،ڈاکٹر ضیاء القیوم

جمعرات 16 ستمبر 2021 16:27

ایبٹ آباد۔(اُردو پوائنٹ اخبارتازہ ترین - اے پی پی۔ 16 ستمبر2021ء) علامہ اقبال اوپن یونیورسٹی کے وائس چانسلر پروفیسر ڈاکٹر ضیاء القیوم نے کہا کہ علامہ اقبا ل اوپن یو نیورسٹی ایبٹ آباد میں یونیورسٹی کے طلبہ کو انٹرنیٹ سہولتیں فراہم کرینگے جبکہ کوہاٹ، پشاور، مردان، تیمرگرہ،اورسوات کے ریجنل آفسز کی عمارتوں کی تعمیر کے لئے اراضی حاصل کرنے میں یونیورسٹی کو کامیابی مل گئی ہے اورمردان ریجن کی عمارت کی تعمیر کے لئے صوبائی حکومت نے 20کنال اراضی فراہم کرنے کی حامی بھری ہے اور ضلعی انتظامیہ کو اراضی کے انتخاب کی ذمہ داری سونپ دی گئی ہے۔

ان خیا لا ت کا اظہار انہو ں نے گزشتہ روز علا مہ اقبا ل اوپن یو نیورسٹی ایبٹ آباد ریجن کے دورہ کے موقع پر کیا۔علامہ اقبال اوپن یونیورسٹی کے وائس چانسلر پروفیسر ڈاکٹر ضیاء القیوم نے خیبر پختونخوا کے دورے کے آخری مرحلے میں گذشتہ روز ایبٹ آباد کا دورہ کیا۔

(جاری ہے)

ایبٹ آباد میں حکومتی عہدیداران، سیاسی و سماجی شخصیات، طلبہ اور ٹیوٹرز کے ساتھ ملاقات میں انہوں نے یونیورسٹی کی ڈیجٹلائزیشن پر تفصیلی گفتگو کی۔

ڈاکٹر ضیاء القیوم نے کہا کہ یونیورسٹی کے طلباء و طالبات کو''گھر بیٹھے تعلیم''کے نعرے کے ساتھ آن لائن سہولتیں فراہم کردی گئیں ہیں۔ وائس چانسلر نے طلبہ اور انکے والدین سے بات کرتے ہوئے کہا کہ آپ لوگ ایبٹ آباد کے مرکزی مقام پر کسی سکول یا کالج کی نشاندہی کریں یونیورسٹی اُس ادارے کی انتظامیہ سے گفت و شنید کے بعد وہاں پر مقامی طلبہ کے لئے کمپیوٹر اور انٹرنیٹ کی سہولت فراہم کرد ے گی تاکہ وہ یونیورسٹی کی آن لائن سہولتوں سے مفت استفادہ کرکے اپنا تعلیمی سلسلہ بلاتعطل جاری رکھ سکیں۔