سکھر، صوبہ سندھ اوربلوچستان میں موٹرسائیکل چور گینگ کے سربراہ گرفتار

بدھ 22 ستمبر 2021 14:34

سکھر(اُردو پوائنٹ اخبارتازہ ترین - اے پی پی۔ 22 ستمبر2021ء) صوبہ سندھ اوربلوچستان میں موٹرسائیکل چوری کی وارداتوں میں ملوث گینگ کے سربراہ بدنام زمانہ ملزم دین محمدعمرانی کو سکھر پولیس نے گرفتار کرلیا ہے۔ ترجمان سکھر پولیس کے مطابق ایس ایچ او روہڑی ثناء اللہ کھونھارو نے دیگر پولیس پارٹی کے ہمراہ روہڑی کے علاقے مچھرکالونی میں کامیاب کارروائی کرتے ہوئے کئی روز سے ضلع سکھر کے مختلف شہروں میں یکے بعد دیگرے موٹرسائیکل چوری کی وارداتوں میں ملوث گینگ کے مرکزی ملزم دین محمد عمرانی کو گرفتار کرلیا ہے۔

پولیس نے چھاپہ مار کارروائی کے دوران گرفتار ملزم کے قبضے سے موٹرسائیکل چوری میں استعمال ہونے والے مختلف آلات اسکرو، پانے، ہتھوڑا، کٹر، ماسٹرچابیاں، پلاس ودیگر تالہ توڑ آلات بھی قبضے میں لے لئے ہیں۔

(جاری ہے)

مذکورہ گرفتار ملزم کچھ عرصہ سے ضلع بھرکی پولیس کے لئے درد سر بنا ہوا تھا۔چند روز کے دوران اس نے درجنوں موٹرسائیکلیں چوری کیں ۔یہ گینگ صوبہ بلوچستان کے مختلف اضلاع میں بھی موٹرسائیکل چوری کی ورداتیں کرتا رہا ہے۔

اس سلسلے میں ایس ایچ او روہڑی ثناء اللہ کھونھارو کا کہنا ہے کہ ملزم کا تعلق بلوچستان کے علاقے بولان سے ہے۔ ملزم سکھر، روہڑی سمیت بیشتر شہروں میں موٹرسائیکل چوری کی درجنوں وارداتوں میں ملوث تھا۔ضلع بھر کی پولیس کو اس موٹرسائیکل گینگ کی تلاش تھی ۔گرفتار ملزم سے مزید تفتیش جاری ہے ۔اسکے دیگر ساتھی اور سہولت کاروں کو بھی گرفتار کرلیا جائے گا۔

ملزم کے خلاف روہڑی تھانے میں مقدمہ درج کرلیا گیا ہے۔ دوسری جانب ایس ایس پی سکھر عرفان علی سموں نے روہڑی کے ایس ایچ او ثناء اللہ کھونھارو سمیت دیگر پولیس پارٹی کو کامیاب کارروائی پر شاباشی کا پیغام دیا ہے۔ واضح رہے گرفتار ملزم کی ضلع سکھر کے متعدد علاقوں سے موٹرسائیکل چوری کی سی سی ٹی وی سے فوٹیج بھی حاصل کی گئی تھی اور اسکی گرفتاری کے لئے چھاپہ مار کاروائیاں بھی کی گئی تھیں،تاہم روہڑی پولیس نے کامیاب کاروائی کرکے ضلع بھرکی پولیس کے لئے درد سر بننے والے موٹرسائیکل چور گینگ کے مرکزی ملزم کو گرفتار کرلیا۔