حکومت نے چینی کی 89.75روپے فی کلو گرام پر دستیابی یقینی بنانے کیلئے ڈپٹی کمشنرز کو ہدایات جاری کر دی

صوبائی وزیر میاں اسلم اقبال کا بعض شہروں میں اشیائے کی زائد نرخوں پر فروخت پر اظہار ناراضگی، صورتحال جلد از جلد بہتر بنانے کا حکم ذخیرہ اندوزی کی روک تھام کیلئے انتظامیہ اور پولیس چینی کی نقل و حمل پر کڑی نظر رکھے، شوگر ملوں میں سٹاک کی فیزیکل تصدیق کی جائے‘ چیف سیکرٹری

ہفتہ 25 ستمبر 2021 23:19

لاہور(اُردو پوائنٹ اخبارتازہ ترین - این این آئی۔ 25 ستمبر2021ء) پنجاب حکومت نے صوبہ بھر میں چینی کی 89.75روپے فی کلو گرام کی قیمت پر دستیابی یقینی بنانے کیلئے تمام ڈپٹی کمشنرز کو ہدایات جاری کر دیں۔ہدایات صوبائی وزیر صنعت و تجارت میاں اسلم اقبال اور چیف سیکرٹری پنجاب کامران علی افضل کی زیر صدارت اجلاس میں جاری کی گئیں۔اجلاس میں اشیا ئے ضروریہ کی قیمتوں،دستیابی اور پرائس کنٹرول مجسٹریٹس کی کارکردگی کا جائزہ لیا گیا۔

صوبائی وزیر میاں اسلم اقبال نے بعض شہروں میں اشیا ئے ضروریہ کی زائد نرخوں پر فروخت پر ناراضگی کا اظہار کرتے ہوئے صورتحال جلد از جلد بہتر بنانے کی ہدایت کی۔انہوں نے کہا کہ اپنی ہی مقرر کردہ قیمتوں پر عملدرآمد میں ناکامی انتظامیہ کی کارکردگی پر سوالیہ نشان ہے، کارکردگی اسی وقت نظر آئے گی جب قیمتوں میں استحکام ہوگا۔

(جاری ہے)

انہوں نے کہا کہ چینی، آٹا اور دیگر اشیا ء کی زائد نرخوں پر فروخت کسی صورت برداشت نہیں کی جائے گی اورغفلت اور کوتاہی پر ذمہ داروں کیخلاف ایکشن ہوگا۔

انہوں نے کہا کہ گرانفروشی پرجرمانے کی بجائے دکان سیل کرنے کی واضح ہدایت پر عمل کیا جائے۔چیف سیکرٹری نے ڈپٹی کمشنرز کو ہدایت کی کہ شوگر ملوں میں موجود سٹاک کی فیزیکل تصدیق کی جائے۔ انہوں نے کہا کہ ذخیرہ اندوزی کی روک تھام کیلئے انتظامیہ اور پولیس چینی کی نقل و حمل پر کڑی نظر رکھے۔ انہوں نے کہا کہ زرعی اجناس کی قیمتوں میں عدم استحکام کی بنیادی وجہ منڈیوں کا ناقص نظام ہے، کرپشن اور بے ضابطگیوں میں ملوث مارکیٹ کمیٹیوں کے اہلکاروں کیخلاف سخت کارروائی عمل میں لائی جائے۔

انہوں نے کہا کہ نئی زرعی منڈیوں کے قیام کے عمل کو تیزی سے آگے بڑھایا جائے، قیمتوں میں استحکام کیلئے سپلائی چین کے نظام کیساتھ انتظامی اقدامات کو بہتر بنانا ہوگا۔ چیف سیکرٹری نے تمام دکانوں پر ریٹ لسٹیں نمایاں طور پر آویزاں کروانے سے متعلق بھی ہدایات جاری کیں۔صنعت، زراعت، خوراک کے محکموں کے یڈمنسٹریٹوسیکرٹریز،چیئرمین پی آئی ٹی بی، کمشنرلاہور اور متعلقہ افسران نے اجلاس میں شرکت کی جبکہ تمام ڈویژنل کمشنرز اور ڈپٹی کمشنرز ویڈیو لنک کے ذریعے شریک ہوئے۔

متعلقہ عنوان :