طیاروں کیساتھ پرندے ٹکرانے کے واقعات میں تشویش ناک اضافہ، قومی ایئرلائن کو بھاری نقصان

جنوری تا ستمبر 2021 تک 9 ماہ میں طیاروں کے ساتھ پرندے ٹکرانے کے 60 واقعات رپورٹ ہوئے، پی آئی اے کو لاکھوں ڈالرز کے نقصان کا سامنا کرنا پڑا

بدھ 13 اکتوبر 2021 23:32

اسلام آباد (اُردو پوائنٹ اخبارتازہ ترین۔ 13 اکتوبر2021ء) طیاروں کیساتھ پرندے ٹکرانے کے واقعات میں تشویش ناک اضافہ، قومی ایئرلائن کو بھاری نقصان۔ تفصیلات کے مطابق قومی ایئرلائن کو طیاروں سے پرندوں کے ٹکرانے کے واقعاے کی وجہ سے لاکھوں ڈالرز کے نقصان کا سامنا کرنا پڑ رہا ہے۔ اس حوالے سے پاکستان انٹرنیشنل ائیرلائن نے طیاروں سے پرندوں کے ٹکرانے سے متعلق رپورٹ جاری کردی۔

ملک بھر کے مختلف ایئرپورٹس پر طیاروں سے پرندے ٹکرانے سے متعلق پی آئی اے نے جنوری تا ستمبر 2021 تک کی رپورٹ جاری کی ہے۔ جاری رپورٹ کے مطابق ملک کے مختلف ایئرپورٹس پر طیاروں سے پرندے ٹکرانے کے واقعات میں اضافہ ہوا ہے۔ رپورٹ میں بتایا گیا ہے کہ 9 ماہ میں طیاروں کے ساتھ پرندے ٹکرانے کے 60 واقعات رپورٹ ہوئے۔

(جاری ہے)

رپورٹ کے مطابق پرندوں کے ٹکرانے کی وجہ سے قومی ایئرلائن کو لاکھوں ڈالر نقصان کا سامنا کرنا پڑا جبکہ سب سے زیادہ واقعات لاہور ایئرپورٹ پر رپورٹ ہوئے ہیں۔

علامہ اقبال انٹرنیشنل ایئر پورٹ لاہور پر اس عرصے کے دوران پرندے ٹکرانے کے 21 واقعات رپورٹ ہوئے۔اسلام آباد میں13، کراچی میں8، ملتان میں ایک واقعہ رپورٹ ہوا جبکہ سکھر میں4، کوئٹہ میں ایک، پشاور 6 اور گلگت میں 3 واقعات رپورٹ ہوئے۔رپورٹ میں بتایا گیا کہ پرندے ٹکرانے سے پی آئی اے کے بوئنگ 777، ایئر بس 320 اور اے ٹی آر طیارے متاثر ہوئے۔رپورٹ کے مطابق پی آئی اے کے طیاروں سے پرندے ٹکرانے کے 2 واقعات سعودی عرب کے شہر ریاض ، ایک واقعہ شارجہ میں پیش آیا۔

رپورٹ کے مطابق پرندے ٹکرانے کے باعث نہ صرف قومی ایئرلائن کو اضافی اخراجات برداشت کرنا پڑتے ہیں ، پروازوں کا شیڈول بھی متاثرہوتا ہے۔ متعلقہ حکام کی جانب سے اقدامات کیے جانے کے بعد باوجود طیاروں کیساتھ پرندے ٹکرانے کے واقعات میں تشویش ناک حد تک اضافہ ہوا ہے۔