نیب، منی لانڈرنگ کی تفتیش کرنے والا کنسلٹنٹ منور گوپانگ گرفتار

ہفتہ 16 اکتوبر 2021 12:29

کراچی(اُردو پوائنٹ اخبارتازہ ترین - این این آئی۔ 16 اکتوبر2021ء) قومی احتساب بیورو کراچی میں تعینات رہنے والے کنسلٹنٹ منور گوپانگ کو گرفتار کر لیا گیا۔تفصیلات کے مطابق نیب کراچی نے ایک بڑی کارروائی میں منی لانڈرنگ کی تفتیش کرنے والے کنسلٹنٹ منور گوپانگ کو گرفتار کر لیا ہے۔

(جاری ہے)

ذرائع نے بتایاکہ نیب کراچی میں منور گوپانگ منی لانڈرنگ کیس کی تفتیش کے لیے بہ طور کنسلٹنٹ تعینات تھے، انھیں اہم نوعیت کے کیسز میں ملزمان سے مبینہ طورپر رقم لینے کے الزام میں گرفتار کر لیا گیا ہے۔

ذرائع کے مطابق منور گوپانگ نیشنل بینک کا افسر ہے، اور اسٹیٹ بینک کی سفارش پر نیب میں دو سال کے لیے تعینات ہوئے تھے، وہ 2015 سے 2017 تک نیب میں تعینات رہے۔منور گوپانگ پر ایف آئی اے بینکنگ سرکل میں بھی تحقیقات کا کیس درج ہے، ایف آئی اے منور گوپانگ کے خلاف نیشنل بینک بنگلا دیش برانچ میں مبینہ طور پر کروڑوں کی کرپشن کی تحقیقات کر رہا ہے۔ذرائع کے مطابق نیب کراچی نے منور گوپانگ کی گرفتاری کے بعد تفتیش کا آغاز کر دیا ہے۔