مدارسِ عربیہ کے مسائل اور مشکلات کے حل کے لیے ہمہ وقت کوشاں ہیں‘ طاہرمحمود اشرفی

لاہور (اُردو پوائنٹ اخبارتازہ ترین - این این آئی۔ 24 اگست2026ء) چیئرمین پاکستان علما کونسل و کوآرڈینیٹر قومی پیغامِ امن کمیٹی حکومتِ پاکستان حافظ محمد طاہر محمود اشرفی نے کہا ہے کہ مدارسِ عربیہ کے مسائل اور مشکلات کے حل کے لیے ہمہ وقت کوشاں ہیں، آج بروز منگل کو اسلام آباد میں ڈائریکٹر جنرل ریلیجیس ایجوکیشن کے زیرِ اہتمام ہونے والے اجلاس میں مدارس کی مشکلات اور مسائل کے حل کے لیے اہم فیصلے کیے جائیں گے۔

ان خیالات کا اظہار انہوں نے نظام المدارس پاکستان کے زیر اہتمام پوزیشن ہولڈر طلبہ کے اعزاز میں سالانہ تقریبِ تقسیمِ انعامات کے موقع پر خطا کرتے ہوئے کیا ۔ تقریب میں ملک اور بیرونِ ملک سے تشریف لانے والے علما، مشائخ اور شیوخ کی بڑی تعداد نے شرکت کی۔

(جاری ہے)

تقریب سے خطاب کرتے ہوئے حافظ محمد طاہر محمود اشرفی نے کہا کہ بینک اکائونٹس اور رجسٹریشن کا معاملہ جلد از جلد حل کی طرف آگے بڑھ رہا ہے۔

پاکستان میں 33سے 35ہزار مدارس ہیں جن میں سے 22ہزار مدارس ڈائریکٹر جنرل ریلیجیس ایجوکیشن کے ساتھ رجسٹرڈ ہو چکے ہیں۔پاکستان میں 15مدارس کے بورڈز ہیں جن میں سے 10ڈائریکٹر جنرل ریلیجیس ایجوکیشن کے ساتھ رجسٹرڈ ہو چکے ہیں اور جو پرانے نظام کے تحت اپنی رجسٹریشن چاہتے ہیں ان پر بھی کسی کو اعتراض نہیں ہے۔ مدارسِ عربیہ دینی تعلیم کے ساتھ ساتھ جدید تعلیم بھی دے رہے ہیں، جس کا واضح ثبوت اس سال مختلف اسکول بورڈز میں مدارس کے طلبا کا پوزیشنیں حاصل کرنا ہے۔

متحدہ مدارس کونسل مدارس کے مسائل کے حل کے لیے ہمہ وقت کوشاں ہے اور وزیراعظم پاکستان اور حافظ سید عاصم منیر کے شکر گزار ہیں کہ وہ مدارس کے مسائل کے حل کے لیے مسلسل دلچسپی لے رہے ہیں اور ہدایات جاری کر رہے ہیں۔انہوں نے کہا کہ مدارسِ عربیہ پاکستان، اسلام اور قوم کی گراں قدر خدمت انجام دے رہے ہیں۔ مدارس میں طلبہ کو دینی علوم کے ساتھ عصری تعلیم بھی دی جارہی ہے۔

طلبہ کی تعلیم و تربیت کا یہ عظیم عمل اس بات کا واضح ثبوت ہے کہ مدارس ملک و قوم کی تعمیر و ترقی میں بھرپور کردار ادا کررہے ہیں۔ انہوں نے کہا کہ نظام المدارس پاکستان کے تحت تقریبا 33سے 35ہزار مدارس رجسٹرڈ ہیں، جبکہ پاکستان میں مدارس کی تعلیم کے 15 باقاعدہ بورڈ کام کررہے ہیں۔ انہوں نے مزید کہا کہ حکومت کی مسلسل محنت اور فیلڈ مارشل حافظ سید عاصم منیر کی خصوصی دلچسپی و کاوشوں سے مدارس کے تمام تعلیمی بورڈز کا اہم اجلاس منعقد ہورہا ہے، جس میں مدارس کی رجسٹریشن، بینک اکائونٹس اور دیگر دیرینہ مسائل کے عملی حل کے لیے اہم پیش رفت متوقع ہے۔