Live Updates

قومی سلامتی کمیٹی کا اجلاس ؛ متفقہ فیصلہ کیا گیا کہ مذکرات کے دروازے بند نہ کیے جائیں ، شیخ رشید

میں اور نور الحق قادری کالعدم تنظیم سے مذاکرات کررہے ہیں ، ہماری خواہش ہے کہ معاملات خوش اسلوبی سے حل ہو جائیں۔ وزیر داخلہ کی قومی سلامتی کمیٹی کے اجلاس کے بعد میڈیا سے گفتگو

ساجد علی جمعہ 29 اکتوبر 2021 15:28

قومی سلامتی کمیٹی کا اجلاس ؛ متفقہ فیصلہ کیا گیا کہ مذکرات کے دروازے ..

اسلام آباد ( اُردو پوائنٹ اخبارتازہ ترین ۔ 29 اکتوبر 2021ء ) وفاقی وزیر وزیر داخلہ شیخ رشید احمدن نے کہا ہے کہ قومی سلامتی کمیٹی کے اجلاس میں متفقہ فیصلہ کیا گیا کہ مذکرات کے دروازے بند نہ کئے جائیں ، ہماری خواہش ہے کہ معاملات خوش اسلوبی سے حل ہو جائیں۔ تفصیلات کے مطابق قومی سلامتی کمیٹی کے اجلاس کے بعد میڈیا سے گفتگو کرتے ہوئے انہوں نے کہا کہ میں اور نور الحق قادری کالعدم تنظیم سے مذاکرات کررہے ہیں ، وزیراعظم آفس قومی سلامتی کمیٹی اجلاس کا متعلق اعلامیہ جاری کرے گا ، ہماری خواہش ہے معاملات خوش اسلوبی سے حل ہوں کیوں کہ حکومت نے لوگوں کے جان ومال کے تحفظ کو یقینی بنانا ہے لیکن اس کے ساتھ ریاست کی رٹ کو بھی ہر حال میں قائم رکھنا ہے۔

قبل ازیں وزیراعظم عمران خان کی زیر صدارت ہونے والے قومی سلامتی کمیٹی کا اجلاس ہوا ، جس میں کالعدم جماعت کے دھرنے سے متعلق غور کیا گیا ، اجلاس میں کالعدم جماعت کے مارچ سمیت قومی سلامتی کے دیگر امورکی حکمت عملی پربھی غور کیا گیا۔

(جاری ہے)

بتایا گیا ہے کہ اجلاس میں آرمی چیف جنرل قمر جاوید باجوہ، ڈی جی آئی ایس آئی لیفٹیننٹ جنرل فیض حمید، نیول چیف امجد خان نیازی، ایئرچیف ظہیر احمد بابر،ڈی جی آئی بی، ڈی جی ایف آئی اے، وزیر خارجہ شاہ محمود قریشی، وزیر داخلہ شیخ رشید، فوادچوہدری، پرویزخٹک ، نورالحق قادری نےشرکت کی۔

دوسری طرف وفاقی تحقیقاتی ایجنسی نے کالعدم تنظیم کا سوشل میڈیا نیٹ ورک چلانے والے 12 افراد کو گرفتار کر لیا ، یف آئی اے کے سائبر کرائم ونگ نے کالعدم تنظیم کا سوشل میڈیا نیٹ ورک چلانے والوں کے خلاف لاہور ، بہاولپور، فیصل آباد، ننکانہ صاحب اور اسلام آباد سمیت دیگر شہروں میں آپریشن کیا ، اس دوران محمد حسن، غلام شبیر، شاہزیب نذیر ، نعیم اختر ، ایوب ، حسین رسول اور حمزہ شیخ سمیت 12 افراد کی گرفتاری عمل میں لائی گئی ، جس سے متعلق ایف آئی اے حکام نے بتایا کہ یہ افراد سوشل میڈیا پر نفرت انگیز مواد اور جعلی تصویریں اور ویڈیوز اپ لوڈ کر رہے تھے۔