ووٹ کو عزت دو کے ساتھ مخلص ہیں تو بیک ڈور رابطے ختم کرائیں، کائرہ

حکومت کو جنوری سے آگے نہیں جانے دیں گے، ر ہنما پیپلز پارٹی کی میڈیا گفتگو

منگل 9 نومبر 2021 22:22

لاہور (اُردو پوائنٹ اخبارتازہ ترین - آن لائن۔ 09 نومبر2021ء) پیپلزپارٹی کے سیئنر رہنما قمر زمان کائرہ نے کہا ہے کہ ووٹ کو عزت دو کے ساتھ مخلص ہیں تو بیک ڈور رابطے ختم کرائیں، لاہور میں میڈیا سے گفت گو کرتے ہوئے قمر زمان کائرہ نے کہا کہ اپنے ساتھیوں کو دیکھیں کہ وہ کس کے ساتھ ہیں نئے انتخابات کی بات کرتے ہیں تو ساتھی پیچھے ہٹ جاتے ہیں،سابق حکمران کہتے ہیں کہ ہم چاہتے ہیں کہ حکومت 5 سال پورے کرے۔

پی ڈی ایم اب عملاً ختم ہو چکی ہے، جب تک پیپلز پارٹی پی ڈی ایم میں تھی اس میں جان تھی۔

(جاری ہے)

قمرالزمان کائرہ نے کہا کہ ملک میں مہنگائی اوربیروزگاری نے لوگوں کو مشکل میں ڈال دیا ہے اور حکومت دوسرے ممالک سے پاکستان کا موازنہ کررہی ہے۔غریب کا بھوک سے برا حال ہے اوریہ کہتے ہیں آپ نے گھبرانا نہیں،چینی،آٹا،تیل اور دیگر اشیا کی قیمتوں میں اضافہ ہوگیا اورمزید ہوگا۔وزیراعظم قیمتیں بڑھا کرکہتے ہیں ہم سیکھ رہے ہیں،ہمیں مہنگائی میں دنیا کی مثالیں نہ دیں غریب کوریلیف دیں،چینی کی قیمت میں اضافہ ہوا،اس میں کہاں سے ڈالر کا عمل دخل ہے۔ اس صورتحال سے نکلنے کا واحد حل حکومت سے چھٹکارا ہے۔