Live Updates

7 ممالک سے مسافروں کی متحدہ عرب امارات آمد پر پابندی عائد

کورونا وائرس کی نئی قسم کے پھیلاو کے بعد اماراتی حکومت نے بھی 7 افریقی ممالک سے پروازوں کی آمد روک دی

muhammad ali محمد علی ہفتہ 27 نومبر 2021 00:40

7 ممالک سے مسافروں کی متحدہ عرب امارات آمد پر پابندی عائد
ابوظہبی (اُردو پوائنٹ اخبارتازہ ترین۔ 26 نومبر2021ء) 7 ممالک سے مسافروں کی متحدہ عرب امارات آمد پر پابندی عائد، کورونا وائرس کی نئی قسم کے پھیلاو کے بعد اماراتی حکومت نے بھی 7 افریقی ممالک سے پروازوں کی آمد روک دی۔ خلیج ٹائمز کی رپورٹ کے متحدہ عرب امارات نے کورونا وائرس کی جنوبی افریقی قسم کے پھیلاو کے پیش نظر ہنگامی فیصلہ کیا ہے۔ اماراتی حکومت نے 7 جنوبی افریقی ممالک سے پروازوں کی امارات آمد پر پابندی عائد کر دی ہے، تاہم متحدہ عرب امارات میں موجود وہ شہری جو پابندی والے ممالک کا سفر کرنا چاہیں، انہیں ان ممالک جانے کی اجازت دی جائے گی۔

اماراتی حکومت کے اعلان کے مطابق سفری پابندیوں کے اس فیصلے کا اطلاق 29 نومبر سے ہو گا۔ جن ممالک سے پروازوں کی آمد پر پابندی عائد کی گئی ہے، ان ممالک میں جنوبی افریقہ، نمیبیا، بوٹسوانا، ایسواتینی، زمبابوے، مزمبیق شامل ہیں۔

(جاری ہے)

اس سے قبل سعودی عرب نے بھی اس صورتحال میں فوری اہم فیصلہ لیتے ہوئے 7 جنوبی افریقی ممالک پر سفری پابندیاں عائد کر دیں۔



دوسری جانب غیرملکی میڈیا کے مطابق صورتحال پر غور کے لیے عالمی ادارہ صحت نے ہنگامی اجلاس بلالیا ہے۔ اس صورتحال میں دنیا کے کئی ممالک نے ہنگامی اقدامات شروع کر دیے ہیں۔ یورپی ممالک نے بھی فوری طور پر مذکورہ ممالک سے پروازوں کی آمد و رفت بند کرنے کا فیصلہ کیا ہے۔ یورپی یونین کے 27 ممالک نے متفقہ فیصلہ کیا کہ جن جنوبی افریقی ممالک میں کورونا کی نئی قسم پھیلنے کا انکشاف ہوا ہے، ان پر سفری پابندیاں عائد کر دی جائیں۔

غیر ملکی میڈیا کے مطابق ہنگامی طور پر عائد کی گئی نئی سفری پابندیاں مارکیٹ میں خوف اور غیر یقینی کی صورتحال پیدا کرنے کا باعث بنی ہیں۔ جنوبی افریقی ممالک میں کورونا وائرس کی نئی قسم پھیلنے کے انکشاف کے بعد عالمی مارکیٹ میں خام تیل کی قیمتیں 12 فیصد گر گئیں، جبکہ یورپی اسٹاک مارکیٹس میں بدترین مندی دیکھی جا رہی ہے۔ بتایا گیا ہے کہ عالمی مارکیٹ میں تیل کی قیمتوں میں ڈیڑھ سال کے دوران سب سے بڑی یومیہ گراوٹ دیکھنے میں آئی ہے، خام تیل کی قیمتیں میں 12 فیصد گر گئیں۔

امریکی خام تیل کی قیمت میں 7 ڈالر فی بیرل سے زائد کی کمی ہوئی جس سے فی بیرل قیمت 70 ڈالر کی سطح سے نیچے آگئی۔ برینٹ خام تیل کی قیمت میں بھی 8 ڈالر سے زائد کی کمی ہوئی ہے جس سے فی بیرل قیمت 73 ڈالرز کی سطح تک گر گئی۔ عالمی میڈیا کے مطابق خام تیل کی قیمتوں میں یہ کمی اپریل 2020ء کے مقابلے میں سب سے بڑی کمی ہے جو کہ ڈیڑھ سال بعد ہوئی ہے۔
Live کرونا کی نئی قسم اومیکرون کا پھیلاو سے متعلق تازہ ترین معلومات