پاکستان نے امریکا میں شیڈول بین الاقوامی کانفرنس میں شرکت سے معذرت کر لی

پاکستان کو امریکا کی جانب سے جمہوریت سے متعلق سمٹ میں شرکت کی دعوت دی گئی تھی

محمد علی بدھ 8 دسمبر 2021 23:03

اسلام آباد(اُردو پوائنٹ اخبارتازہ ترین۔ 08 دسمبر2021ء) پاکستان نے امریکا میں شیڈول بین الاقوامی کانفرنس میں شرکت سے معذرت کر لی، پاکستان کو امریکا کی جانب سے جمہوریت سے متعلق سمٹ میں شرکت کی دعوت دی گئی تھی۔ تفصیلات کے مطابق پاکستان نے جمہوریت سے متعلق امریکا کی میزبانی میں شیڈول ایک کانفرنس میں شرکت نہ کرنے کا فیصلہ کیا ہے۔ میڈیا رپورٹس کے مطابق ڈیموکریسی ورچوئل سمٹ نامی ایونٹ 9 اور 10 دسمبر کو ہوگا، جس میں کئی ممالک کے نمائندے شرکت کریں گے۔

تاہم پاکستان نے امریکا میں جمہوریت سے متعلق سمٹ میں شرکت نہ کرنے کا فیصلہ کیا ہے۔ اس حوالے سے ترجمان دفتر خارجہ کی جانب سے جاری کیے گئے بیں میں کہا گیا ہے کہ ہم سمٹ برائے جمہوریت میں شرکت کے لیے پاکستان کو مدعو کرنے پر امریکا کے شکر گزار ہیں۔

(جاری ہے)

پاکستان ایک بڑی فعال جمہوریت ہے جس میں ایک آزاد عدلیہ، متحرک سول سوسائٹی اور آزاد میڈیا ہے۔

ہم جمہوریت کو مزید مضبوط کرنے، بدعنوانی کے خاتمے اور تمام شہریوں کے انسانی حقوق کے تحفظ اور فروغ کے لیے پرعزم ہیں۔ اپنے بیان میں ترجمان دفتر خارجہ نے مزید کہا کہ حالیہ برسوں میں پاکستان نے ان اہداف کو آگے بڑھانے کے لیے وسیع پیمانے پر اصلاحات کا آغاز کیا جن کے مثبت نتائج برآمد ہوئے ہیں۔ ہم امریکا کے ساتھ اپنی شراکت کو قدر کی نگاہ سے دیکھتے ہیں جسے ہم دو طرفہ اور علاقائی اور بین الاقوامی تعاون کے لحاظ سے بڑھانا چاہتے ہیں۔

پاکستان مشترکہ اہداف کو آگے بڑھانے کے لیے بات چیت، تعمیری کردار اور بین الاقوامی تعاون کو مضبوط بنانے کے لیے تمام کوششوں کی حمایت جاری رکھے گا۔ یہاں یہ واضح رہے کہ امریکا نے ڈیموکریسی ورچوئل سمٹ میں چین اور روس کو مدعو نہیں کیا تھا، جبکہ پاکستان نے دعوت ملنے کے باوجود خود کو اس سمٹ سے دور رکھنے کا فیصلہ کیا ہے۔