لانگ مارچ کیلئے پی ٹی آئی کے پاس فنڈز کی شدید کمی کی اطلاعات

پارلیمنٹرینز تنخواہ سے 50 ہزار روپے بھی دینے کو تیار نہیں، اطلاع ہے کہ لیڈرشپ کہہ کہہ کر تھک گئی ہے مگر کسی ایم این اے یا ایم پی اے کے کان پہ جوں تک نہیں رینگ رہی؛ اینکر پرسن اسداللہ خان کا دعویٰ

ساجد علی جمعرات 10 ستمبر 2026 15:34

لانگ مارچ کیلئے پی ٹی آئی کے پاس فنڈز کی شدید کمی کی اطلاعات

اسلام آباد (اُردو پوائنٹ اخبارتازہ ترین۔ 10 ستمبر 2026ء) پاکستان تحریک انصاف (پی ٹی آئی) کو 27 ستمبر کے متوقع لانگ مارچ سے قبل شدید مالی بحران کے سامنے کی اطلاعات سامنے آئی ہیں۔ اینکر پرسن اسد اللہ خان کے مطابق تحریک انصاف کی مرکزی قیادت نے لانگ مارچ کے اخراجات پورے کرنے کے لیے پارٹی سے 50 کروڑ روپے جمع کرنے کا بھاری ہدف مقرر کیا تھا، جس کے تحت تمام ایم این ایز اور ایم پی ایز پر واضح مالی ذمہ داریاں عائد کی گئی تھیں۔

انہوں نے بتایا کہ قیادت کی جانب سے تمام اراکینِ صوبائی اسمبلی کو اپنے اپنے حلقوں اور وسائل سے 50,50 لاکھ روپے کا فنڈ جمع کرنے کی ہدایت کی گئی تھی، لیکن 50 لاکھ تو دور کی بات صورتحال یہ ہے کہ ارکان اپنی ماہانہ سرکاری تنخواہوں سے محض 50 ہزار روپے بھی لانگ مارچ کے فنڈز میں دینے کو تیار نہیں ہیں۔

(جاری ہے)

لانگ مارچ کے لیے پی ٹی آئی کے پاس فنڈز کی شدید کمی ہے، پارلیمنٹرینز اپنی تنخواہ سے پچاس ہزار روپے بھی دینے کو تیار نہیں۔ اطلاع ہے کہ پی ٹی آئی لیڈرشپ کہہ کہہ کے تھک گئی ہے مگر کسی ایم این اے یا ایم پی اے کے کان پہ جوں تک نہیں رینگ رہی۔
یاد رہے کہ کچھ دن پہلے پارٹی نے پچاس کروڑ…
— Asad Ullah Khan (@AUKhanOfficial1) September 10, 2026

اسد اللہ خان کا کہنا ہے کہ پی ٹی آئی کی مرکزی قیادت اپنے ارکان کو احتجاجی فنڈز کی فراہمی کے لیے بار بار یاددہانی اور اپیلیں کر کر کے تھک چکی ہے مگر کسی بھی رکنِ اسمبلی یا رہنما کے کان پر جوں تک نہیں رینگ رہی، یہ مسئلہ اب پارٹی کے اندرونی حلقوں میں ایک انتہائی سنگین اور پیچیدہ صورتحال اختیار کر چکا ہے، جہاں آئندہ سیاسی معرکے اور لانگ مارچ کو مالی تحفظ فراہم کرنے کی تمام امیدیں دم توڑتی دکھائی دے رہی ہیں۔