عمران خان سے اعلیٰ ترین سطح پربات چیت ہورہی ہے، اسی سال جیل سے باہر آ جائیں گے، بریگیڈیئر (ر) اسلم گھمن

مذاکرات میں شامل کچھ شخصیات سے میری بات ہوئی ہے، لیکن ان کے نام فی الحال امانت ہیں اس لیے پبلک نہیں کیے جا سکتے، عمران خان اپنے اصولوں پر سختی سے قائم ہیں؛ پی ٹی آئی رکن قومی اسمبلی کی گفتگو

ساجد علی جمعرات 10 ستمبر 2026 13:54

عمران خان سے اعلیٰ ترین سطح پربات چیت ہورہی ہے، اسی سال جیل سے باہر ..

اسلام آباد (اُردو پوائنٹ اخبارتازہ ترین۔ 10 ستمبر 2026ء) پاکستان تحریک انصاف کے رکنِ قومی اسمبلی بریگیڈیئر ریٹائرڈ اسلم گھمن نے دعویٰ کیا ہے کہ سابق وزیراعظم عمران خان کی رہائی اور سیاسی بریک تھرو کے لیے اعلیٰ ترین سطح پر بات چیت جاری ہے اور وہ اسی سال جیل سے باہر آ جائیں گے۔ اے آر وائی نیوز کو انٹرویو دیتے ہوئے انہوں نے کہا کہ پسِ پردہ اہم پیشرفت ہو رہی ہے، عمران خان کی رہائی کے معاملے پر اعلیٰ ترین سطح پر بات چیت جاری ہے، مذاکرات میں شامل کچھ شخصیات سے میری بات ہوئی ہے، لیکن ان کے نام فی الحال امانت ہیں اس لیے پبلک نہیں کیے جا سکتے، عمران خان اپنے اصولوں پر سختی سے قائم ہیں اور وہ کبھی کسی ایسی بات پر راضی نہیں ہوں گے کہ ملک و قوم پر کسی مخصوص طبقے کی اجارہ داری قائم رہے۔

(جاری ہے)

پی ٹی آئی رہنما نے دعویٰ کیا کہ موجودہ سیاسی و معاشی حالات کی وجہ سے عمران خان کی رہائی زیادہ دور نہیں، موجودہ حکمرانوں سے نہ ملک سنبھل رہا ہے اور نہ ہی معیشت چل رہی ہے، موجودہ حکمران نالائقوں اور کرپٹ لوگوں کا ٹولہ ہے، ملک میں گڈ گورننس نام کی کوئی شے باقی نہیں بچی، اس لیے عمران خان سے بات چیت کامیاب ہوگی اور وہ اسی سال جیل سے باہر آ جائیں گے۔

انٹرویو کے دوران رکنِ اسمبلی نے وفاقی وزیر قیصر احمد شیخ کا ذکر کرتے ہوئے کہا کہ وہ ایک شریف اور ایماندار انسان ہیں اور فارم 47 والی پیداوار نہیں ہیں، لیکن دوسری طرف ملک میں فرعونیت کی یہ حد ہے کہ ایک وفاقی وزیر بھی وزیراعظم سے آسانی سے نہیں مل سکتا، وزیراعلیٰ اور دیگر حکمران عوامی مسائل حل کرنے کے بجائے صرف سرکاری جہازوں اور ہیلی کاپٹروں میں بیٹھ کر گھومنے کے اہل رہ گئے ہیں۔