لمز میں 2020 اور 2021 کی کانووکیشن کا انعقاد

لاہور(اردو پوائنٹ تازہ ترین اخبار ۔ 17 جنوری 2022ء) لمز کے پرو چانسلر جناب عبدالرزاق داؤدکی سربراہی میں سال 2019 کے بعد پہلی بار 2020کی کلاس کے ان کیمپس کانووکیشن کا انعقاد15 جنوری 2022 کو بروز ہفتہ جبکہ 2021 کی کلاس کے ان کیمپس کانووکیشن کا انعقاد 16جنوری 2022کو بروز اتوار لمز کے لاہور کیمپس میں کیا گیا۔دونوں تقاریب میں لمز کے فاونڈنگ پرو چانسلر سید بابر علی اور لمز بورڈ آف ٹرسٹیز کے ممبر ڈاکٹر پرویز حسن بھی موجود تھے۔

 طلبہ نے لمز کمیونٹی کے طور پراپنی کامیابی کے جشن کو ایک ساتھ منانے پر خوشی کا اظہار کیا ۔ رجسٹرار محترمہ زارا فتح قزلباش نے اپنے پرتپاک خطاب میں طلباء اور ان کے والدین کا گرم جوشی سے خیرمقدم کیا جس کے بعد وائس چانسلر ڈاکٹر ارشد احمد اورمہمانان ِخصوصی نے بھی طلبہ سے خاص اظہارِ خیال کیا۔

(جاری ہے)

اپنے خطاب کے دوران وائس چانسلر ڈاکٹر ارشد احمد نے سال2020اور2021 کے سفر کے دوران گزرے قابل ذکر لمحات کا حوالہ دیتے ہوئے ان سالوں کوہمت اور برداشت سے منسلق کیا۔

جیسا کہ ہم ابھی تک اس وبائی بیماری کی گرفت سے نکلنے کی کوشش کر رہے ہیں، وائس چانسلر نے لمزکمیونٹی کے تمام ممبران بشمول طلباء، سٹاف، فیکلٹی ممبران ، اور والدین کومشکل حالات میں یکجاں اورثابت قدم رہنے جبکہ ٹیکنالوجی کے ذریعے سیکھنے کے عمل کو بلاتعطل جاری رکھنے پرمثالی خراج تحسین پیش کیا ۔انہوں نے طلباء کو زندگی کے ہر پہلو میں معیارکو اہمیت دینے اوراسے اپنانے کی ترغیب دی۔

ڈاکٹر ارشد احمد نے ترقی کی منزلیں طے کرنے کے لیے طلباء کو میرٹ ، دیانتداری اور احساس کے ساتھ ساتھ تحقیق اور مقصد کے ذریعے معاشرے کی خدمت کرنے اور مثبت تبدیلی لانے کا بھی مشورہ دیا۔

 معروف ماہر تعلیم ، دانشور، ماہرِ ثقافت اور انسانی حقوق کی کارکن ڈاکٹر عارفہ سیدہ زہرہ نے 2020 کی کلاس سے کلیدی مقرر کے طور پر خطاب کیا۔انہوں نے طلبہ پر زور دیا کہ تعلیم کا سب سے بڑا جوہر امکان کی تلاش ہے جسکی دولت احساس سے اکٹھی کی جاسکتی ہے۔

تعلیم ، تربیت اورمعاشرتی یکجہتی کی اہمیت بیان کرتے ہوئے انہوں نے کہا کہ یہ ایسے اہم مقاصد ہیں جن سے امکان کا احساس جاگتا ہے اور ترقی کی نئی راہیں کھلتی ہیں۔

مشہور آرکیٹیکٹ اورارشد شاہد عبداللہ پرائیوٹ لمیٹڈ کے ڈائریکٹرجناب شاہد عبداللہ نے دوسرے دن کلیدی مقرر کے طور پر 2021 کی کلاس سے خطاب کیا۔ انہوں نے عملی مہارتوں کو حاصل کرنے اوراپنے خوابوں کو پورا کرنے کے لیے تخلیقی صلاحیتوں کو بروکار لانے کی ترغیب دی۔

انہوں نے طلباء پر زور دیا کہ وہ اسائش کے دائرے سے جرات مندانہ انداز میں باہر نکلیں اور جدیدسوچ کے ذریعے اپنے مقاصد کو حاصل کریں۔شاہد عبداللہ نے معاشرے کی خدمت کرنے اور اچھے کام کرنے کی اہمیت پر اپنے خطاب کا اختتام کیا۔

دونوں کانووکیشنز کے دوران مذکورہ بالا خطابات کے بعد تمام فارغ التحصیل طلباء کو ڈگریوں سے نوازا گیا جبکہ پی ایچ ڈی کے گریجویٹس کی بھی رسمی ستائش کی گئی۔ اعلیٰ کارکردگی کا مظاہرہ کرنے والے طلباء کو نیشنل مینجمنٹ فاؤنڈیشن ایوارڈز اور کارپوریٹ میڈلز سے سراہا گیا۔

دونوں تقاریب کی ریکارڈ شدہ نشریات کا ملاحضہ مندرجہ ذیل لنکس پر کیا جاسکتا ہے۔
کانووکیشن 2020
کانووکیشن 2021