پاکستان کا پہلا جدید ترین زیرو فائیو فور ایلفا پی گائیڈڈ میزائل ایئر ڈیفنس فریگیٹ نیوی کا حصہ بننے کیلئے تیار

فریگیٹ سطح سے سطح پر مار کرنے والے سُپر سونک یا آواز کی رفتار سے تیز میزائلوں سے لیس ہے،پاک بحریہ میں شامل ہونے والا غیرمعمولی فریگیٹ پی این ایس تغرل دشمن کیلئے مہلک پیغام ہے

دانش احمد انصاری اتوار 23 جنوری 2022 23:05

کراچی (اُردو پوائنٹ، اخبار تازہ ترین، 23 جنوری 2022) پاکستان کا پہلا جدید ترین زیرو فائیو فور ایلفا پی گائیڈڈ میزائل ایئر ڈیفنس فریگیٹ کل نیوی کا حصہ بنے گا، فریگیٹ سطح سے سطح پر مار کرنے والے سُپر سونک یا آواز کی رفتار سے تیز میزائلوں سے لیس ہے۔ تفصیلات کے مطابق پاکستان کا پہلا جدید ترین زیرو فائیو فور ایلفا پی گائیڈڈ میزائل ایئر ڈیفنس فریگیٹ کل نیوی کا حصہ بنے گا۔

ذرائع کے مطابق صدر ڈاکٹر عارف علوی پی این ایس تغرل کی بحری بیڑے میں شمولیت کی تقریب کے مہمان خصوصی ہوں گے۔پاک بحریہ میں شامل ہونے والا غیرمعمولی فریگیٹ پی این ایس تغرل دشمن کیلئے مہلک پیغام ہے۔ فریگیٹ سطح سے سطح پر مار کرنے والے سُپر سونک یا آواز کی رفتار سے تیز میزائلوں سے لیس ہے۔سپر سانک میزائل دشمن کے اہداف کو 450 کلومیٹر تک سمندر یا زمین پر نشانہ بنا سکتا ہے۔

(جاری ہے)

جہاز کا ریڈار نظام 280 سے 500 کلومیٹر تک سطح سمندر، فضا اور زمین پر اہداف کی نشاندہی کر سکے گا۔فریگیٹ سٹیلتھ صلاحیت، خودکار ٹیکنالوجی، کمیونیکیشن، سونارز اور سینسرز رکھتا ہے۔ 4 ہزار ٹن وزنی، 165 افراد کے عملے، 27 ناٹ رفتار، ہیلی لینڈنگ اور ہینگر کا حامل ہے۔پاکستان اور چین کے مابین چار 054 ایلفاء پی فریگیٹس کی خریداری کا معاہدہ 2017ء میں ہوا تھا۔

پاکستان کے لیے چینی ساختہ پہلے جنگی جہاز کی کمشنگ گزشتہ سال 8 نومبر کو شنگھائی میں ہوئی تھی۔یاد رہے کہ ریڈار نظام، فضائی نگرانی پر معمور طیاروں کی مدد، دشمن طیاروں کو نشانہ بنانے میں کارگر ہے۔ پی این ایس تغرل، دشمن آبدوزوں کے خلاف ٹارپیڈوز سمیت انتہائی تباہ کن ہتھیاروں کا حامل ہے۔